फ्रेंच फ्राईज, बर्गर, पिझ्झा यांसारख्या चटपटीत पदार्थांची चव वाढवणारा मसाला म्हणजे पेरी पेरी. या मसाल्याचं नुसतं नाव जरी काढलं तरी त्याची चव जिभेवर रेंगाळते. कॅफेवाला चुकून जरी हा मसाला फ्रेंच फ्राईज वर टाकायचा विसरला तर आपसूकच अरे भाई पेरी पेरी बोला था, अस वाक्य तोंडून पडतं.

आपल्याकडे हल्ली अनेक पदार्थांवर हा मसाला घातला जातो. मस्त तिखट व तितकाच चविष्ट असा हा मसाला एखाद्या साध्या पदार्थांचीही लज्जत वाढवतो. सगळ्या पदार्थात घातला जाणारा हा पेरी पेरी मसाला विकत आणण्यापेक्षा घरच्या घरीही आपण बनवू शकतो. तर कसं ते पुढीलप्रमाणे...

साहित्य

• ओरेगॅनो - १ टेबलस्पून

• काश्मिरी लाल मिरची पावडर - २ टेबलस्पून

• आमचूर पावडर - १ टेबलस्पून

• ड्राय आल्याची पावडर / सुंठ पावडर - १ टेबलस्पून

• दालचिनी - १ काडी

• वेलची पूड - १/४ टेबलस्पून

• सैंधव मीठ - १ टेबलस्पून

• काळीमिरी पूड - १ टेबलस्पून

• साखर - १ टेबलस्पून

• मीठ - १/२ टेबलस्पून

• गार्लिक पावडर - १ टेबलस्पून

• ड्राय ओनियन पावडर - १ टेबलस्पून

• चिली फ्लेक्स - १ टेबलस्पून

कृती

पेरी पेरी मसाला बनवण्यासाठी सर्व साहित्य मिक्सर जारमध्ये एकत्र करा. नंतर त्याची बारीक पावडर होईपर्यंत ब्लेंड करा. पावडर तयार झाल्यावर हवाबंद काचेच्या बरणीमध्ये भरुन ठेवा. तुम्ही तो एअरटाईट डब्यात साठवून कमीत कमी १ महिना वापरु शकता.

पेरी-पेरी मसाल्याचा वापर पास्तामध्येही करता येतो. यामुळे चव आणखी लज्जदार होते. मॅगी मसाला आणि त्याचे कॉम्बिनेशन एकदम बेस्ट आहे. तुम्हाला हवे असल्यास हा मसाला तुम्ही सॅलडमध्येही घालू शकता.

हा मसाला टिकण्यासाठी कोणती काळजी घ्याल

• मसाला वापरल्यानंतर बरणीचे झाकण घट्ट लावा. झाकण उघडे राहिल्यास मसाला खराब होतो.

• मसाले नेहमी अंधाऱ्या जागी ठेवा. कारण सूर्यप्रकाशाच्या संपर्कात आल्यावर त्याच्या स्वादामध्ये बदल होतो.

• मसाल्याचा डबा गॅसजवळ ठेवू नका. उष्णतेमुळे मसाल्यांची चव खराब होऊ शकते.