जागतिक आरोग्य संघटना (डब्लूएचओ), ‘संयुक्त राष्ट्रांचे निर्वासितांसाठी उच्चायुक्त’ (यूएनएचसीआर) ही ‘यूएन’ची निर्वासितांसाठी काम करणारी संघटना आणि इतर संस्थांनी २० जून रोजी जागतिक निर्वासित दिनाचे आयोजन केले होते. यंदा या दिनासाठी ‘निर्वासितांना समर्थन’ ही संकल्पना राबविण्यात आली.

निर्वासितांसाठी सर्वसमावेशक आरोग्य प्रणाली तयार करण्यास आणि जगभरातील निर्वासितांची समान काळजी घेण्यावर ‘डब्लूएचओ’ने भर दिला आहे. जबरदस्तीने विस्थापित झालेल्यांचे माहिती ‘यूएन’कडे नोंदविण्यात आली असून ‘यूएनएचसीआर’च्या अंदाजानुसार २०२३ च्या अखेरपर्यंत जगभरात ११ कोटी ७३ लाख लोक जबरदस्तीने विस्थापित झाले होते.

कोलंबिया, जर्मनी, इराण, पाकिस्तान आणि तुर्कियेने जगातील पाचपैकी दोन निर्वासित आणि आंतरराष्ट्रीय संरक्षणाची गरज असलेल्यांना आश्रय दिला आहे.

‘यूएनएचसीआर’च्या माहितीनुसार एकूण निर्वासितांपैकी जवळजवळ तीन चतुर्थांश आणि आंतरराष्ट्रीय संरक्षणाची गरज असलेले अन्य लोक फक्त पाच देशांमधून विस्थापित झाले आहेत.