पाकिस्तानव्याप्त काश्‍मीरमध्ये आज बस दरीत कोसळून झालेल्या अपघातात २६ जणांचा मृत्यू झाला. चालकाचे गाडीवरील नियंत्रण सुटल्याने हा अपघात झाल्याचा प्राथमिक अंदाज पोलिसांनी व्यक्त केला आहे. पाकिस्तानमध्ये दुसऱ्या एका बस अपघातात ११ भाविकांचा मृत्यू झाला.
स्थानिक माध्यमांनी दिलेल्या माहितीनुसार, पाकव्याप्त काश्‍मीरमधील एका घाटावरून बस जात असताना ती अनेक फूट खोल दरीत कोसळली. चालक व वाहक यांच्यासह बसमध्ये ३५ जण होते. अपघातात बसचा चेंदामेंदा होऊन यापैकी २६ जणांचा मृत्यू झाला, तर नऊ जण जखमी झाले.
मृतांमध्ये बालके व महिलांचाही समावेश आहे. पोलिसांच्या मदतीने नागरिकांनी दरीत कोसळलेल्यांना बाहेर काढले. या अपघाताबद्दल देशाचे अध्यक्ष असिफ अली झरदारी यांनी दु:ख व्यक्त केले आहे.
दुसऱ्या एका घटनेत बलुचिस्तान प्रांतातील मकरान कोस्टल महामार्गावरून ७० यात्रेकरूंना घेऊन बस वेगाने जात असताना नियंत्रण सुटल्याने ती उलटली. या अपघातात ११ जणांचा मृत्यू झाला, तर ३५ जण जखमी झाले. हे सर्व प्रवासी शिया पंथीय असून ते इराणमधून यात्रा करून परतत होते. काही दिवसांपूर्वीच पाकिस्तानी यात्रेकरूंची बस इराणमध्ये कोसळून झालेल्या अपघातात ३५ भाविकांचा मृत्यू झाला होता.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.