सोमालिया जवळ एक जहाज हायजॅक करण्यात आल्याचा धक्कादायक प्रकार समोर आला आहे. महत्वाची बाब म्हणजे, या जहाजामध्ये १५ भारतीय क्रू मेंबर देखील आहेत. 'एमव्ही लीला नॉरफोक' (MV LILA NORFOLK) नावाचे हे जहाज सोमालियाच्या समूद्र हद्दीपासून हायजॅक करण्यात आले आहे.

हायजॅक केल्याची माहिती मिळताच भारतीय नौदलाने याची गंभीर दखल घेतली आहे. भारतीय नौदलाने आपली युद्धनौका आयएनएस चन्नई हायजॅक केलेल्या जहाजाच्या दिशेने रवाना केली आहे. तसेच नौदलाने ही स्थिती हाताळण्यासाठी तयार असल्याचे म्हटले आहे.

भारतीय नौदलाच्या अधिकाऱ्यांनी दिलेल्या माहितीनुसार, हायजॅक करण्यात आलेलेय जहाज 'एमव्ही लीला नॉरफोक' याचा शोध घेण्यासाठी लक्ष ठेवले जात आहे. या जहाजाचे अपहरण झाल्याची माहिती गुरूवारी संध्याकाळी मिळाली. सोमालियाच्या किनाऱ्याजवळ अपहरण झाल्यानंतर या जहाजावर लायबेरियाचा झेंडा लावण्यात आाला आहे. भारतीय नौदल या जहाजाकडे लक्ष ठेवून आहे, तसेच क्रू मेंबर्ससोबत कम्युनिकेशन स्थापित करण्यात आले आहे. तसेच सर्व क्रू मेंबर जहाजामध्ये सुरक्षित आहेत असेही सांगण्यात आले आहे.

सोमालियाच्या किनाऱ्याजवळ जहाज हायजॅक केले जाण्याची ही पहिली घटना नाही, काही दिवसांपूर्वीच सोमालिया येथील समुद्री चाच्यांनी अरबी समुद्रात माल्टा येथील जहाज एमव्ही रुएन हायजॅक केले होते. या घटनेची माहिती मिळताच भारतीय नौदलाने लगेच तत्परता दाखवली होती. यावेळी नेव्हीने एक युद्धनौका आणि विमान पाठवले होते, त्यानंतर भारतीय नौदलाने हे जहाज रेस्क्यू केले होते.