वॉशिंग्टन- अमेरिकेचे माजी अध्यक्ष डोनाल्ड ट्रम्प यांच्यावर जीवघेणा हल्ला झाला आहे. यात ते थोडक्यात बचावले आहेत. एका रॅलीला संबोधित करत असताना अचानक हल्ला करण्यात आला. जवळपास बंदुकीचे नऊ राऊंड फायर करण्यात आले. एक गोळी ट्रम्प यांच्या कानाला चाटून गेली. मिळालेल्या माहितीनुसार, ट्रम्प यांच्यावर दोन हल्लेखोरांनी हल्ला केला होता.

स्थानिक माध्यमांनुसार डोनाल्ड ट्रम्प यांच्यावर हल्ला करणाऱ्या दोन्ही शुटर्संना ठार करण्यात आले आहे. एक शुटर सभेत गर्दीमध्ये होता, तर दुसरा इमारतीवर होता. दोघांनी ट्रम्प यांच्या दिशेने गोळ्या झाडल्या होत्या. सुरक्षा रक्षकांनी शुटर्संना ठार केल्याचा व्हिडिओ समोर आला आहे. यावेळी शुटर्स आणि सुरक्षा रक्षकांमध्ये चकमक झाल्याचं पाहायला मिळालं.

अमेरिकेचे अध्यक्ष जो बायडेन यांनी या हल्ल्याचा निषेध केला आहे. अशाप्रकारच्या हिंसेला अमेरिकेमध्ये कसलेही स्थान नाही. अशी प्रवृत्ती निच आहे. म्हणूनच आपल्याला एकत्र यायचं आहे, असं बायडेन म्हणाले आहेत. कमला हॅरेस यांनी देखील या हल्ल्याचा निषेध केला आहे. डेमोक्रेटिक आणि रिपब्लिक पक्षाच्या नेत्यांनी ट्रम्प यांच्यावरील हल्ल्यावर संतप्त प्रतिक्रिया दिल्या आहेत.

निवडणुकीनिमित्त डोनाल्ड ट्रम्प पेनेसेल्वेनिया येथे सभा घेत होते. यावेळी अचानक गोळीबार झाला. काही वेळ काय होतय हे कळालं नाही. डोनाल्ड ट्रम्प आहे त्या ठिकाणी खाली बसले. त्यानंतर सुरक्षा रक्षकांनी त्यांना घेरलं आणि सुरक्षितपणे त्यांना बाहेर काढलं. माहितीनुसार, ट्रम्प यांच्या कानाला दुखापत झाली आहे. त्यांच्या कानातून रक्त येत असल्याचं व्हिडिओमध्ये दिसत आहे.

डोनाल्ड ट्रम्प यांना रुग्णालयात दाखल करण्यात आले होते. उपचार घेतल्यानंतर त्यांना सोडण्यात आल्याची माहिती आहे. डोनाल्ड ट्रम्प हल्ल्यानंतर प्रतिक्रिया देताना म्हणालेत की, अशा भ्याड हल्ल्यांना ते घाबरणार नाहीत. दरम्यान, अमेरिकेमध्ये नोव्हेंबर महिन्यात अध्यक्षीय निवडणूक पार पडणार आहे. ट्रम्प प्रबळ दावेदार असल्याचं म्हटलं जातं.