Twitter Fake Account: ट्विटरच्या डिलनंतर सोशल मीडियावर मोठ्या प्रमाणात चर्चेत आलेला इलॉन मस्क हिंदी आणि भोजपुरी भाषेतून ट्विट करतोय अशी खळबळ सगळीकडे उडाली होती. मात्र हे सगळे ट्विट इलॉन मस्कच्या नावावर इयान वुलफोर्ड नावाचा तोतया इलॉन करत असल्याची माहिती पुढे आली. इलॉनच्या नावावर ट्विट करणाऱ्या या व्यक्तीची दखल घेत आता त्याचं ट्विटर अकाउंट सस्पेंड करण्यात आलंय.

इयान वुलफोर्ड सतत मस्कच्या नावाने ट्विट करत होता, त्यामुळे त्याचं अकाउंटच आता सस्पेंड करण्यात आलंय. शनिवारी सकाळपासून इलॉनचे हिंदी आणि भोजपुरी भाषेतील ट्विट चर्चेचा विषय बनले होते. ट्विटर यूजर इयान वुलफोर्ड ((Ian Woolford) ने त्याचे नाव बदलत इलॉन मस्क केले होते. त्यामुळे अनेकांना मस्क खुद्द हिंदी आणि भोजपूरी भाषेत ट्विट करत असल्याचे वाटले.

कोण आहे इयान वुलफोर्ड?

हा तोतया इलॉन मस्क नेमका आहे तरी कोण असा अनेकांना प्रश्नही पडला असेल. ऑस्ट्रेलियाच्या मेलबर्नमधील 'ला ट्रोब युनिवर्सिटी'मध्ये तो साउथ एशियन कोर्स शिकवतो. या व्यक्तीस केवळ हिंदीच नाही तर उर्दू, संस्कृत, भोजपुरी आणि पर्शियन भाषेचीही माहिती आहे. त्याच्या हिंदी आणि उर्दू ट्विटने मात्र सोशल मीडियावर प्रचंड खळबळ उडवली होती.