इस्तंबूल - युक्रेनमधून धान्याची निर्यात सुरु झाल्यानंतर आज आणखी तीन जहाजे एकूण ५८ हजार टन मका घेऊन तुर्कियेच्या दिशेने रवाना झाली. येथे या जहाजांची तपासणी होऊन नंतर ती लेबनॉनला पाठविली जाणार आहेत.

तुर्कियेच्या संरक्षण मंत्रालयाने दिलेल्या माहितीनुसार, युक्रेनहून निघालेल्या या तीन जहाजांनी काळा समुद्र पार केला असून उद्या (ता. ६) ती तुर्कियेला पोहोचतील. प्रचंड आर्थिक संकटात असलेल्या लेबनॉनला हा धान्यपुरवठा केला जाणार आहे. युक्रेन-रशिया यांच्यातील युद्धानंतर धान्याचे कोठार समजले जाणाऱ्या युक्रेनमधून धान्य निर्यात ठप्प झाली होती. तुर्किये आणि संयुक्त राष्ट्रांच्या मध्यस्थीने ही निर्यात आता पुन्हा सुरु झाली आहे.

दरम्यान, युक्रेनच्या दोनेत्स्क भागातील काही गावांवर रशियाने आज जोरदार बाँबहल्ले केले. या हल्ल्यांमध्ये किमान पाच जणांचा मृत्यू झाल्याचे सूत्रांनी सांगितले. दोनेत्स्कवर रशियाने ताबा मिळविला असला तरी काही गावांमधून अजूनही विरोध होत आहे.

हल्ल्यांमुळे किरणोत्सर्गाचा धोका

रशियाने मायकोलेव्ह आणि झॅपोरिझ्झिया या शहराजवळच्या अणु प्रकल्पांवर हल्ले केल्याने किरणोत्सर्गाचा धोका निर्माण झाला असल्याचा इशारा ब्रिटनच्या गुप्तचर संस्थेने दिला आहे.