कोरोना महामारीने जगभरात हाहाकार माजवला. असा एकही देश उरला नाही, जिथे कोरोनाचे रुग्ण आढळले नाहीत. कोरोनाच्या परिस्थितीमुळे लोकांना अनेक अडचणींना सामोरे जावे लागले. अनेकांना आपल्या जवळच्या व्यक्तींना गमवावं लागलं. एकूणच कोरोना महामारीने सर्वांच्या आयुष्यात कमी-जास्त प्रमाणात दु:ख आणले. असे असले तरी सर्वात सुखी देशांच्या यादीमध्ये जास्त काही फरक पडलेला नाही. फिनलँड सलग चौथ्या वर्षी जगातील सर्वात आनंदी आणि सुखी देश ठरला आहे. संयुक्त राष्ट्राकडून शुक्रवारी जारी करण्यात आलेल्या रिपोर्टनुसार फिनलँडला जगातील सर्वांत सुखी देशाचा मान मिळाला आहे. संयुक्त राष्ट्राकडून जारी करण्यात आलेल्या या यादीत 149 देशांचा समावेश करण्यात आला होता. 

यादी जाहीर करताना देशाची जीडीपी, सामाजिक सुरक्षा, व्यक्तिगत स्वातंत्र्य, भ्रष्टाचार अशा विविध मुद्द्यांवर पश्न विचारले जाऊन हॅपीनेस स्कोर तयार केला जातो. यामध्ये गेल्या तीन वर्षातील सरासरी डेटा घेतला जातो. गेल्या 9 वर्षापासून हा रिपोर्ट जारी करण्यात येत आहे. पुन्हा एकदा या यादीमध्ये यूरोपीय देशांचा दबदबा पाहायला मिळालाय. फिनलँडनंतर या यादीत डेन्मार्कने दुसरे स्थान मिळवले आहे. त्यानंतर स्वित्झर्लंड, आईसलँड आणि नेदरलँड या देशांनी स्थान मिळवलं आहे. 

कोरोनाची लक्षणे असूनही रिपोर्ट निगेटिव्ह; फ्रान्समधील नव्या स्ट्रेनने खळबळ

न्यूझीलँडची यावेळी एका स्थानाने घसरण झाली असून तो नवव्या स्थानी आहे. पहिल्या 10 देशांमध्ये केवळ न्यूझीलँडला स्थान मिळू शकलेले आहे. जर्मनीच्या रँकिंगमध्ये सुधारणा झाली असून तो 17 व्या स्थानावरुन 13 व्या स्थानावर गेला आहे. फ्रान्सचीही दोन अकांनी सुधारणा झाली असून 21 व्या स्थानावर पोहोचला आहे. ब्रिटेन 13 व्या स्थानावरुन 17 व्या स्थानी गेला आहे. जगातील सर्वात श्रीमंत देश अमेरिका 19 व्या स्थानी आहे. 

त्सुनामीमध्ये हरवलेला पोलिस 16 वर्षांनी विचित्र अवस्थेत सापडला

आफ्रीकेचे देशे लेसोथो, बोत्सवाना, रवांडा आणि झिम्बाब्वे यादीमध्ये सर्वात खालच्या स्थानी आहेत. अफगाणिस्तान जगातील सर्वात दु:खी देश आहे. महामारीचा परिणाम जाणून घेण्यासाठी मागील वर्षाच्या डेटासोबत तुलना करण्यात आली, यात दिसून आलं की एक तृतीयांश देशांमधील लोकांमध्ये नकारात्मकता वाढीस लागली आहे. तर 22 देशांमध्ये सकारात्मकता वाढली आहे. भारताला या यादीत 139 वे स्थान मिळाले आहे. त्यामुळे दु:खी देशांच्या यादीत भारत दहाव्या स्थानी आहे. चीन या यादीत 85 व्या स्थानी आहे. पाकिस्तानचा यादीत 105 वा नंबर असून नेपाळ 87 व्या स्थानी आहे. बांगलादेश 101 व्या स्थानी, तर श्रीलंका 129 व्या स्थानी आहे.