सॅन फ्रान्सिस्को : क्रोम ब्राऊजरच्या माध्यमातून मागील काही वर्षांत अमेरिकेतील साडेतीन कोटी लोकांची गोळा केलेली वैयक्तिक माहिती काढून टाकण्याची तयारी ‘गुगल’ने दर्शविली आहे.

नागरिकांवर बेकायदा पद्धतीने देखरेख ठेवली जात असल्याचा ‘गुगल’वर आरोप झाल्यानंतर न्यायालयातील तडजोडीअंतर्गत या अब्जावधी नोंदी काढून टाकल्या जाणार आहेत.

वापरकर्त्यांची वैयक्तिक माहिती त्यांची परवानगी न घेता गोळा करणे, ती साठवून ठेवणे आणि व्यावसायिक कारणांसाठी त्यांची विक्री करणे, असे आरोप मागील काही वर्षांत ‘गुगल’सह काही सोशल मीडिया कंपन्यांवर झाले आहेत.

‘गुगल क्रोम’च्या धोरणांवर जून २०२० मध्ये झालेल्या आरोपाबाबत न्यायालयात तडजोड झाली असून त्यानुसार या कंपनीने अमेरिकेतील सुमारे तीन कोटी साठ लाख नागरिकांच्या साठवून ठेवलेल्या अब्जावधी नोंदी काढून टाकण्याचा निर्णय घेतला आहे.