बँकॉक - बहुतेक सर्व आंतरराष्ट्रीय परिषदांमध्ये अनेक वर्षांपासून अन्नसुरक्षेबाबत चिंता व्यक्त करत उपाययोजनांबाबत चर्चा केली जात असताना अद्यापही ही समस्या कायम असल्याचे संयुक्त राष्ट्रांच्या अन्न आणि कृषी संघटनेने प्रसिद्ध केलेल्या अहवालातून दिसून आले आहे. या अहवालानुसार, आशियामध्ये भूक ही मोठी समस्या असून कोरोनापूर्व काळाच्या तुलनेत २०२२ मध्ये साडे पाच कोटी अधिक लोक कुपोषित असल्याचे आढळून आले आहे.

या अहवालात अन्न पुरवठा, अन्नधान्याचा वापर आणि पोषक अन्नाची आवश्‍यकता या मुद्द्यांवर भर देण्यात आला होता. याचा किती परिणाम देशाच्या प्रगतीवर आणि राहणीमानाच्या दर्जावर होतो, हे शोधणे हा अहवालाचा मुख्य हेतू होता. अहवालातील माहितीनुसार, दक्षिण आशियामध्ये भूकेची समस्या मोठी असून अनेक लोकांना पुरेसे अन्न मिळत नाही.

पुरुषांच्या तुलनेत महिलांना कमी अन्न मिळते. २०२१ मध्ये कुपोषित व्यक्तींचे प्रमाण ८.८ टक्के होते, ते २०२२ मध्ये घटून ८.४ टक्के झाले असले तरी, कोरोनापूर्व काळाच्या तुलनेत हे प्रमाण अधिक आहे. त्यामुळे अर्थव्यवस्थेचा मोठा हिस्सा या लोकांच्या पालनपोषणासाठी खर्च होतो.

भूकेच्या समस्येमागील कारणे

• लोकांमध्ये अन्न खरेदी करण्याची क्षमता नसणे

• पैसे कमी असल्याने कमी दर्जाचे अन्न खाणे

• महिलांना पुरुषांच्या तुलनेत कमी अन्न मिळणे

• इंधन, अन्न, खतांच्या किमती वाढल्याने अडथळे

• अन्नपुरवठ्याचे असमान वितरण

अन्नसुरक्षेची समस्या

• २.४ अब्ज : लोकांना अपुरे अन्न उपलब्ध

• ४२ टक्के : महिलांसमोर अन्नसुरक्षेचे संकट

• ३७ टक्के : पुरुषांसमोर संकट

• ३/४ : जणांना पोषक अन्न परवडत नाही (आफ्रिका)

कुपोषणाचे प्रमाण (टक्क्यांमध्ये)

• ९.२ : जगाची सरासरी

• १६ : दक्षिण आशिया