दक्षिण आफ्रिका : तीन आठवड्यांपूर्वी दक्षिण आफ्रिकेत (South Africa) बंदुकधारींनी शाळेत जाणाऱ्या चार भारतीय वंशाच्या मुलांचं अपहरण केलं होतं. परंतु, अपहरण केलेल्या भारतीय वंशाच्या व्यावसायिकाची चार मुलं त्यांच्या पालकांकडे सुखरूप परत आली आहेत. पोलोकवाने (Polokwane) येथे राहणारे व्यापारी नाझिम मोती (Nazim Moti) यांची जिदान (7), जायद (11), अॅलन (13) आणि जिया (15) ही मुलं सुखरूप घरी परतल्याचे पोलिसांनी सांगितलेय.

काही दिवसांपूर्वी पांढरे झगे घालून सात सशस्त्र इसमांनी दोन वाहनांतून या मुलांचं अपहरण केलं होतं. 21 ऑक्टोबर रोजी शाळेच्या वाटेवर त्यांची कार थांबवून हल्लेखोरांनी ही घटना घडवून आणली. मात्र, हे करत असताना या हल्लेखोरांनी चालकाला कोणतीही इजा केली नाही.

पोलिस विश नायडू यांनी सांगितलं, की प्रिटोरियाच्या तशवाने येथील रहिवाशांचा पोलिसांना फोन आला आणि त्यांनी चार मुलं घरी परतल्याचे सांगितले. या चारही मुलांना हल्लेखोरांनी जवळच्या रस्त्यावर सोडून तेथून पळ काढला. पालकांच्या ताब्यात देण्यापूर्वी मुलांची प्रथम वैद्यकीय तपासणी करण्यात आली. त्यांची प्रकृती उत्तम असून त्यांना पालकांच्या ताब्यात देण्यात आलंय. हल्लेखोरांनी या मुलांचं अपहरण का केलं, याबाबत पोलिस अधिक तपास करत आहेत.