Israel Hamas war Updates : इस्राइलकडून गाझामध्ये होत असलेल्या हल्ल्ल्यांमध्ये आतापर्यत ३ हजार ९०० लहान मुलांचा मृत्यू झाला असून प्रत्येक १० मिनिटांमध्ये एकाचा मृत्यू होतोय; असा खळबळजनक दावा हमासद्वारे गाझामध्ये चालवण्यात येत असलेल्या आरोग्य मंत्रालयाच्या आपत्कालिन केंद्राने केला आहे.

या आरोग्य केंद्राचे निर्देशक मोआतोसेम सलाह यांनी रविवारी यासंदर्भात एक विधान केलं आहे. सलाह म्हणाले की, इस्राइलने गाझावर हल्ला सुरु केला तेव्हापासून आतापर्यंत ३९०० बालकांचा मृत्यू झाला आहे. शिवाय ८ हजार ६७ मुलं जखमी आहेत. धक्कादायक बाब म्हणजे १२५० मुलं अजूनही बेपत्ता आहेत. इस्राइलच्या हल्ल्यात मृत्यू झालेल्यांपैकी ७० टक्के मुलं असल्याचा दावा त्यांनी केलाय.

७ ऑक्टोबरला हमासने इस्राइलवर हल्ला केला होता. त्यानंतर इस्राइलकडून गाझावर बॉम्बवर्षाव सुरु आहे. हमासच्या हल्ल्यात १४०० लोक मृत झाले होते आणि २३९ लोकांचं अपहरण करण्यात आलेलं होतं.

दुसरीकडे गाझाच्या आरोग्य विभागातल्या अधिकाऱ्यांनी सांगितलं की, इस्रायली युद्ध विमानांनी रविवारी गाझापट्टीतल्या एका शरणार्थी शिबिरावर हल्ला केला. त्यात कमीत कमी ४० जणांचा मृत्यू झाला आहे आणि अनेकजण जखमी झालेत.

एकीकडे अमेरिकेने सामान्य नागरिकांना दिलासा देण्यासाठी इस्रायलला काही काळासाठी हल्ले रोखण्याचं आवाहन केलं होतं. परंतु इस्रायचं म्हणणं आहे की, गाझामधील हमास शासकांना चिरडून टाकण्यासाठी आमचे हल्ले सुरुच राहतील. अमेरिकेची राजधानी वॉशिंग्टन, फ्रान्सची राजधानी पेरिस, जर्मनीची राजधानी बर्लिन आणि आणखी युरोपीय शहरांमध्ये फिलिस्तानी समर्थक हजारो लोकांनी गाझामधील इस्रायली हल्ले रोखण्याची मागणी केली आहे.

गाझाच्या आरोग्य विभागाने बालकांच्या मृत्यूच्या केलेल्या दाव्यामुळे जगभरात खळबळ उडाली आहे. चिमुकल्यांचे एवढे मृत्यू खेदजनक असल्याचं सांगितलं जातंय. जगभरातून इस्राइलवर दबाव वाढत असला तरी गाझावरली हल्ले रोखले जात नाहीत.