इस्त्राइल आणि पॅलेस्टाइन यांच्यात संघर्ष सुरू असून संपूर्ण जगाचे लक्ष या युद्धाकडे लागले आहे. यादरम्यान इस्त्रइलच्या लष्कराने ७ ऑक्टोबर रोजी दहशतवादी संघटना हमासविरोधात करण्यात आलेल्या एका कारवाईचा व्हिडीओ जारी केला आहे. या व्हिडीओमध्ये इस्त्राइली डिफेन्स फोर्सेस (आयडीएफ)चे जवान ओलीस ठेवलेल्या लोकांना हमासच्या तावडीतून सोडवताना दिसत आहेत.

या लष्करी जवानांचे बॉडी कॅम फुटेज सोशल मीडिया प्लॅटफॉर्म एक्सवर पोस्ट करण्यात आले आहे. आयडीएफने यासोबत माहिती दिली की, इस्त्राइली सेनेने गाझा सेक्योरिटी फेन्सच्या जवळ एक लाइव्ह ऑपरेशन करत हमास दहशतवाद्यांकडून ओलीस ठेवण्यात आलेल्या २५० जणांची सुटका केली. यादरम्यान हमासच्या ६० हून अधिक दहशतवाद्यांना देखील ठार करण्यात आल्याचं देखील सांगण्यात आलं.

आयडीएफने दिलेल्या माहितीनुसार ७ ऑक्टोबर रोजी सूफा सैन्य चौकीवर ताबा मिळवण्यासाठी प्लेटिला १३ यूनिट (आयडीएफची तुकडी) ही गाझा सेक्योरिटी फेन्सजवल तैनात करण्यात आली होती. या जवानांनी जवळपास २५० ओलिसांची सुटका केली आहे. यादरम्यान ६० हून अधिक दहशतवाद्यांना ठार करण्यात आले असून २६ जणांना ताब्यात घेण्यात आले. ज्यामध्ये हमास दक्षिणी नौदल डिव्हीजनचा उप कमांडर मोहम्मद अबू अली देखील होता.