इस्राइल आणि गाझा यांच्यातील युद्ध कधीही मोठं रुप घेऊ शकतं. इस्त्राइल आणि हमास यांच्यात सुरू असलेल्या युद्धाचा आज १० वा दिवस असून यादरम्यान इराण आणि अमेरिकेकडून केली जात असलेली विधाने पाहता हे युध्द आणखी भडकण्याची शक्यता व्यक्त केली जात आहे.

इस्त्रायलने आता लेबनॉनवर क्षेपणास्त्रांनी हल्ला केल्याने युद्धाची व्याप्ती देखील वाढताना दिसत आहे. हिजबुल्लाच्या दहशतवाद्यांना लक्ष्य करून हा हल्ला करण्यात आला. याआधी लेबनॉनमधून इस्रायलच्या एका गावात क्षेपणास्त्रांच्या मदतीने हल्ला करण्यात आला होता.

या युद्धादरम्यान इराणने इस्रायलला धमकी दिली आहे. जर गाझा पट्टी काबीज करण्याचा प्रयत्न केला तर इराणसह इतर देशांचे हात देखील ट्रिगरवर आहेत, असा गंभीर इशारा इराणकडून इस्त्राइला देण्यात आला आहे.

इराणचे परराष्ट्र मंत्री होसेन अमीराबडोल्लाहियान यांनी इस्रायलला इशारा दिला की, पॅलेस्टिन विरोधातील आक्रमकता त्यांनी थांबवली नाही तर या भागात इतर देशही कारवाई करण्यास तयार आहेत. फार्स वृत्तसंस्थेने याबद्दलचे वृत्त दिले आहे. इस्रायलचे पंतप्रधान बेंजामिन नेतन्याहू यांनी हमासला उद्ध्वस्त करण्याची शपथ घेतल्यानंतर होसेन म्हणाले की, इस्रायलचे हल्ले थांबले नाहीत तर, या प्रदेशातील सर्व देशांचे हात देखील ट्रिगरवर आहेत. इराणच्या या इशाऱ्यामुळे या प्रदेशातील तणाव वाढला आहे.

तर ती मोठी चूक असेल

इस्रायलने उत्तर गाझा पट्टीत प्रवेश करण्याची पूर्ण तयारी केली आहे. सीमेवर लष्कर तैनात असून फक्त इशाऱ्याची वाट पाहत आहे. दरम्यान, गाझा पट्टी ताब्यात घेण्याचा इस्रायलचा प्रयत्न ही मोठी चूक असू शकते, असे अमेरिकेचे अध्यक्ष जो बिडेन यांनी एका मुलाखतीत म्हटले आहे.

आतापर्यंत 4000 लोकांचा मृत्यू

गाझामधील हमासच्या दहशतवाद्यांनी शनिवारी 7 ऑक्टोबर रोजी सकाळी इस्रायलवर 5000 हून अधिक रॉकेट डागले होते. तेव्हापासून दोन्ही गटांमध्ये युद्ध सुरू आहे. आत्तापर्यंत दोन्ही बाजूंनी एकूण 4000 हून अधिक लोक मारले गेले आहेत. यापैकी 2670 गाझा भागात मरण पावले आहेत.