तेहरान : इस्राईलच्या हल्ल्यात मारला गेलेला हमासचा म्होरक्या इस्माईल हनिया याच्या शवपेटीजवळ उभा राहून इराणचे सर्वोच्च नेते अयातुल्ला खामेनी यांनी आज प्रार्थना केली. थेट तेहरानमध्येच हल्ला करत हनियाला मारल्याने खामेनी यांनी या हत्येचा सूड घेण्याचा निर्धार जाहीर केला आहे. आजच्या प्रार्थनेवेळी हमासचे काही म्होरकेही उपस्थित होते.

हमासला इराणचा जाहीर पाठिंबा आहे. इस्राईलने बुधवारी पहाटे केलेल्या हल्ल्यात हनिया आणि त्याचा शरीररक्षक मारले गेले. आज त्या दोघांसाठी तेहरान विद्यापीठात प्रार्थनेचे आयोजन करण्यात आले होते. यावेळी प्रचंड गर्दी जमली होती. खामेनी यांच्यासह इराणचे नवे अध्यक्ष डॉ. मसूद पेझेश्‍कियान यांनी हनियाच्या शवपेटीजवळ उभा राहून प्रार्थना केली. यानंतर दोघांच्या शवपेट्या एका ट्रकमध्ये ठेवण्यात आल्या आणि रस्त्यांवरून अंत्ययात्रा काढण्यात आली. जमलेल्या हजारो लोकांनी यावेळी अमेरिका आणि इस्राईलच्या विरोधात जोरदार घोषणाबाजी केली.

हिज्बुल्लाचा म्होरक्या ठार

बैरुत : इराणच्या राजधानीत हल्ला करत हमासच्या राजकीय प्रमुखाला ठार मारल्यापूर्वी काही तास इस्राईलने लेबनॉनची राजधानी बैरुतमध्ये हल्ला केला होता. या हल्ल्यात हिज्बुल्ला या दहशतवादी संघटनेचा एक म्होरक्या फवाद शुकूर मारला गेल्याचे या संघटनेने आज जाहीर केले. इस्राईलच्या हल्ल्यात जी इमारत उद्ध्वस्त झाली, त्यात शुकूर राहत होता. इस्राईलमध्ये मागील आठवड्यात झालेल्या रॉकेट हल्ल्यात बारा मुलांचा मृत्यू झाला होता, या हल्ल्यामागे शुकूरचा हात होता असा इस्राईलचा दावा होता.

‘महंमद देफ हल्ल्यात ठार’

जेरुसलेम : इस्राईलने जुलैमध्ये गाझा पट्टीतील खान युनिस शहरावर केलेल्या एका हल्ल्यात हमासचा लष्करी विभागाचा प्रमुख महंमद देफ याला लक्ष्य करण्यात आले होते. मात्र, या हल्ल्यात तो मेल्याचे जाहीर करण्यात आले नव्हते. हमासनेही देफ जिवंतच असल्याचे म्हटले होते. आज मात्र इस्राईलने १३ जुलैला झालेल्या त्या हल्ल्यात महंमद देफ मारला गेल्याचे स्पष्ट केले. त्या हल्ल्यात ९० जणांचा मृत्यू झाला होता.