शनिवारी हमास दहशतवादी संघटनेने गाझा पट्टीतून इस्राइलवर हल्ला केला होता. यानंतर इस्राइलने युद्धाची घोषणा करत हमासला प्रत्युत्तर देण्यास सुरुवात केली. आपण आपल्या सैनिकांना पूर्णपणे सूट देण्यात आली असून, गाझा पट्टी आता पहिल्यासारखी राहणार नसल्याचं इस्राइलच्या संरक्षण मंत्र्यांनी म्हटलं आहे.

"जे कोणी इथे आमच्या नागरिकांची हत्या करण्यासाठी येईल, महिलांची हत्या करेल, त्याला आम्ही पूर्णपणे संपवून टाकू. यामध्ये कोणतीही तडजोड केली जाणार नाही." असं योआव गॅलंट यांनी इस्राइल-गाझा पट्टीच्या सीमेवर तैनात असणाऱ्या सैनिकांना सांगितलं.

गाझा पट्टीचा चेहरा बदलणार

"हमासला गाझा पट्टीमध्ये बदल हवा होता. त्यांना जो बदल अपेक्षित आहे, त्याच्या 180 अंश वेगळा बदल आम्ही त्यांना दाखवून देऊ. त्यांना या गोष्टीचा पश्चाताप होईल. गाझा पट्टी आता पुन्हा पहिल्यासारखी होणार नाही." असंही गॅलंट यावेळी म्हणाले. यावेळी त्यांनी हमासला गाझा पट्टीतील इसिस असंही म्हटलं.

गॅलंट यांनी मंगळवारी इस्राइल सैन्याच्या गाझा डिव्हिजन हेडक्वार्टर्सला भेट दिली. यावेळी त्यांनी शॅलडाग फायटर्स, पॅराट्रूपर्स आणि सैनिकांशी संवाद साधला. शनिवारी हमासने हल्ला केलेल्या पहिल्या काही लष्करी तळांपैकी एक असलेल्या किब्बुट्झ बेरी तळाला त्यांनी भेट दिली.

"काही महिन्यांनी आपण बेरीमध्ये परत येऊ, आणि तेव्हा परिस्थिती एकदम वेगळी असेल. किब्बुट्झला आपण शेवटच्या मीटरपर्यंत ताब्यात घेऊ आणि गाझामध्ये जे झालं ते पुन्हा होणार नाही" असं ते म्हणाले.