वॉशिंग्टन - रशिया आणि युक्रेनमधील संघर्ष पेटण्याची शक्यता आहे. रशिया (Russia) कधीही युक्रेनवर हल्ला करू शकतो अशी माहिती गुप्तचर संस्थांनी दिल्यानंतर अमेरिकेचे (America) राष्ट्राध्यक्ष ज्यो बायडेन (Joe Biden) आणि रशियाचे राष्ट्राध्यक्ष व्लादिमीर पुतिन (Vladimir Putin) यांच्यातील चर्चा थांबवण्यात आली आहे. बायडेन यांनी पुतिन यांना सांगितलं की,'युक्रेनवर (Ukraine) रशियाने हल्ला केल्यास त्याचे परिणाम म्हणून मानवाला मोठ्या प्रमाणावर त्रास सहन करावा लागेल.' बायडेन आणि पुतिन यांच्यात शनिवारी एक तास फोनवरून चर्चा झाली. यावेळी बायडेन यांनी रशियाला थेट इशारा देत सांगितलं की, जर रशियाने हल्ला केला तर त्याच्या गंभीर परिणामांना सामोरं जावं लागेल.

अमेरिका आणि इतर सहकारी देश रशियाला चोख प्रत्युत्तर देऊ असा इशाराच बायडेन यांनी दिला आहे. तसंच युक्रेनच्या सीमेवर तैनात असलेलं सैन्य हटवण्यास रशियाला सांगण्यात आलं. युक्रेनवर हल्ल्यामुळे रशियाची प्रतिमा मलीन होईल. युक्रेनबाबत अमेरिका चर्चा सुरु ठेवेल मात्र इतर परिस्थितीचा सामना करण्यासही तितक्याच ताकदीने तयार असल्याचंही बायडेन यांनी चर्चेवेळी सांगितलं.

बायडेन यांच्या राष्ट्रीय सुरक्षा सल्लागाराने गुप्तचर संस्थांनी दिलेल्या माहितीनंतर सतर्कतेचा इशारा दिला होता. त्यानुसार ,'बिजिंमध्ये सुरु असलेलं हिवाळी ऑलिम्पिक २० फेब्रुवारीला संपल्यानतंर काही दिवसात रशिया हल्ला करू शकते.'

युक्रेनवर हल्ल्याची शक्यता या चर्चेला रशियाने आतापर्यंत फेटाळून लावलं आहे. अमेरिकेनं स्पष्ट केलं की, जर्मनी, पोलंड, आर्मेनियात तैनात असलेले अमेरिकन सैनिक रशियाविरोधात लढण्यासाठी युक्रेनमध्ये पाठवण्यात आलेले नाहीत. ते युक्रेनमध्ये रशियाविरुद्ध युद्ध लढणार नाहीत. फक्त हल्ल्यापासून नाटो देशाचे संरक्षण करतील.