न्यूयॉर्क : एखादी व्यक्ती लग्नाविना १०० पेक्षा अधिक मुलांची बाप असल्याचे ऐकून तुम्हालाही आश्चर्य वाटेल; पण ही गोष्ट खरी आहे. एका व्यक्तीने नुकतेच सोशल मीडियावर पोस्ट करत, माझी या जगात १०० पेक्षा जास्त जैविक मुले असल्याची माहिती शेअर केली. विशेष म्हणजे या व्यक्तीचे अद्याप लग्न झाले नसून त्यास एकटे राहायला आवडत असल्याचेही म्हटले आहे. हा व्यक्ती आहे, ‘टेलिग्राम’चे सीईओ पावेल डुरोव. वीर्यदानाच्या माध्यमातून त्यांनी आतापर्यंत अनेक जोडप्यांच्या संसारवेलीवर अपत्यरूपी फूल उमलवले आहे.

पावेल यांनी टेलिग्रामवर मंगळवारी (ता. ३०) पोस्ट शेअर करत त्यांच्यातील ‘विकी डोनर’ची माहिती दिली. ते म्हणाले, ‘१५ वर्षांपूर्वी माझा एक मित्र मला भेटायला आला. तो आणि त्याची पत्नी वंध्यत्वामुळे आई-बाबा होऊ शकत नसल्याने त्याने मला वीर्यदान करण्याची विनंती केली. सुरुवातीला मी हसलो; पण नंतर या प्रकरणातील गांभीर्य लक्षात घेऊन मी त्यासाठी एका क्लिनिकमध्ये गेलो. त्या वेळी डॉक्टरांनी दर्जेदार वीर्यदान करणाऱ्या पुरुषांची संख्या अत्यल्प असल्याचे सांगितले.

त्यामुळे अपत्यहीन जोडप्यांसाठी आपण काही तरी केले पाहिजे, म्हणून मी वीर्यदान करण्याचा निर्णय घेतला. त्यानुसार वीर्यदानामुळे आजवर अनेक जोडप्यांच्या आयुष्यात आनंद पेरता आल्याचे मला समाधान आहे.’ पुढे त्यांनी सांगितले की, ‘‘मला या कामाचा अभिमान वाटतो. जगभरात सध्या शुक्राणूंचा दर्जा घसरण्याची समस्या भेडसावत आहे. माझ्या वीर्यामुळे मी कुणाच्या तरी कामी आलो, याचा आनंद वाटतो. चांगली आरोग्य असलेल्या लोकांनी हे काम करण्यासाठी पुढे यायला हवे’’

१२ देशांमध्ये आहेत मुले

‘मागील काळात मी केलेल्या वीर्यदानामुळे जगातील १२ देशांतील १०० जोडप्यांना अपत्यप्राप्ती झाली. त्यामुळे माझी १०० मुले विविध १२ देशांमध्ये आहेत. मागील काही वर्षांपासून मी वीर्यदान करणे बंद केले असले, तरी आयव्हीएफ क्लिनिकमध्ये माझे वीर्य गोठवून ठेवण्यात आले आहे. त्यामुळे अजूनही काही जोडप्यांना त्यातून अपत्यप्राप्ती करता येईल’, असे पावेल यांनी म्हटले आहे.