सौदी अरेबियामध्ये हजदरम्यान 600 हून अधिक हज यात्रेकरूंचा मृत्यू झाल्याची माहिती मिळाली. दरम्यान भारतातून हजला गेलेल्या यात्रेकरूंच्या कुटुंबीयांची चिंता वाढली आहे. यावर्षी भारतातून 1,75,000 यात्रेकरू हजला गेले होते. यापैकी मृत्यू झालेल्यांमध्ये 68 भारतीयांचाही समावेश असल्याची माहिती मिळाली आहे.

गेल्या आठवडाभरात हे मृत्यू झाले असून हजच्या शेवटच्या दिवशी ६ भारतीयांचा मृत्यू झाला आहे. अनेक मृत्यू नैसर्गिक कारणांमुळे आणि वृद्धांचे झाले आहेत, तर काही मृत्यू अति उष्णतेमुळे झाले आहेत. भारतीय नागरिकांच्या मृत्यूबाबत भारत सरकारकडून अद्याप कोणतेही अधिकृत वक्तव्य जारी करण्यात आलेले नाही. (Latest Marathi Global News)

एएफपी वृत्तसंस्थेनुसार, नवीन अहवालानुसार, ही संख्या 645 झाली आहे. गेल्या वर्षी हजदरम्यान 200 हून अधिक मृत्यूची नोंद झाली होती. मृत हज यात्रेकरूंपैकी बहुतांश इजिप्तचे नागरिक आहेत.

हजदरम्यान मरण पावलेल्या 600 हून अधिक हज यात्रेकरूंपैकी सर्वाधिक 323 इजिप्तमधील, 35 ट्युनिशिया, 44 इंडोनेशिया, 41 जॉर्डन, 68 भारतातील आणि 11 इराणचे होते. वृत्तानुसार, मृत हज यात्रेकरूंचे मृतदेह देशात परत पाठवले जाणार नाहीत, त्यांचे दफन सौदी अरेबियातच केले जाईल.

हवामान बदलाचे परिणाम जगभर दिसून येत आहेत. आखाती देशांना याचा अधिक फटका बसत आहे, ओमान, सौदी अरेबिया आणि यूएई सारख्या देशांमध्ये उष्णतेसोबतच मुसळधार पाऊसही पडत आहे. सौदी अरेबियातील तापमान साधारणपणे ४५ अंशांच्या दरम्यानच राहते, मात्र यावर्षी तापमानाने 50 अंशांचा टप्पा ओलांडला आहे. सौदी सरकारी टीव्हीच्या वृत्तानुसार, मक्काच्या ग्रँड मशिदीतील तापमान यावर्षी 51 अंशांवर पोहोचले आहे.