नासा आज पुन्हा एकदा नव्या मोहिमेच्या तयारीत आहे. आज (शनिवारी) नासाकडून नवीन चंद्रयान लाँच करण्यात येणार आहे. 'आर्टेमिस आय' असं नासाच्या या चंद्रयान मोहिमेचं नाव आहे. नासाकडून आज शक्तिशाली चंद्रयान लाँच केले जाणार आहे. फ्लोरिडातील कॅनिडी स्पेस सेंटर येथून आज दुपारी 2 वाजून 17 मिनिटांनी Artemis I हे रॉकेट लाँच करण्यात येणार आहे.

Artemis I हे रॉकेट याआधीच लाँच करण्यात येणार होते. परंतु, यामध्ये तांत्रिक अडथळा आल्यामुळे या रॉकेटचं लाँचिंग पुढे ढकलण्यात आले होते. Artemis I या रॉकेटमधील तांत्रिक बिघाड दूर करण्याचे काम सुरु होतं. आज दुसऱ्यांदा हे रॉकेट लाँच करण्याचा प्रयत्न करण्यात येणार आहे. नासाकडून यासाठीची तयारी सुरु केली आहे. यावेळी हे रॉकेट लाँच यशस्वी होईल अशी आशा नासाच्या शास्त्रज्ञांनी व्यक्त केली आहे.

मानवाला चंद्रावर पाठवण्यापूर्वी ही चाचणी करण्यात येत आहे. या चंद्रयानामधून एकही वैज्ञानिक चंद्रावर जाणार नाही. तर या रॉकेटमध्ये ओरियन कॅप्सूल असणार आहे. ओरियनमध्ये मानवांच्या जागी पुतळे ठेवले जाणार आहेत. यावेळी नासा स्पेससूट आणि रेडिएशन लेवलेचे मूल्यांकन करणार आहे. पुतळ्यांसोबत एक स्नूपी सॉफ्ट टॉय देखील पाठवला जात आहे, जे शून्य गुरुत्वाकर्षण निर्देशक म्हणून काम करेल. ओरियन चंद्राभोवती 42 दिवसांचा प्रवास करेल.

याआधी 29 ऑगस्टला या चंद्रयानचे प्रक्षेपण करण्यात येणार होतं. लाँचची सर्व तयारीही करण्यात आली होती, परंतु प्रक्षेपण होण्यापूर्वीच त्याच्या इंजिनमध्ये तांत्रिक बिघाड निर्माण झाल्याने प्रक्षेपण थांबवण्यात आलं होतं. इंजिन सेन्सरमध्ये काही समस्या निर्माण झाल्याने चंद्रयानाचं प्रक्षेपण थांबवावं लागलं, असं त्यावेळी नासाकडून सांगण्यात आलं होतं.