काठमांडू : नेपाळमध्ये (Nepal) औद्योगिक परिसरात ऑक्सिजन प्लांटमध्ये झालेल्या स्फोटात दोन भारतीय नागरिकांचा मृत्यू झाला आहे. तर सहा जण गंभीर जखमी झाले आहेत. काठमांडूजवळील (Kathmandu) ललितपूर जिल्ह्यातील औद्योगिक परिसरातील सागरमठ याठिकाणी हा स्फोट झाल्याची माहिती पोलिसांनी दिली. मृत्यू झालेले दोघे बिहारचे रहिवासी आहेत.

काठमांडू पोस्टच्या वृत्तानुसार, स्फोट इतका भयंकर होता की अनेक सिलिंडर हवेत उडाले. यातच ब्रिज कुमार महतो (वय-४५) आणि राजकुमार महतो (वय-२५) या दोन भारतीयांचा जागीच मृत्यू झाला. तर सहा नेपाळी नागरिक जखमी झाले आहेत. जखमींना ललितपूर येथील बी अँड बी रुग्णालयात दाखल करण्यात आले आहे. गृहराज्यमंत्री बाळकृष्ण खांड यांनी पोलिसांना तातडीने मदतकार्य सुरू करून अपघाताची चौकशी करण्याचे निर्देश दिले आहेत.

ललितपूरचे जिल्हा दंडाधिकारी घनश्याम उपाध्याय यांनी सांगितले की, स्फोटाची भीषणता इतकी होती की अनेक सिलिंडर हवेत उडाले आणि शेजारच्या तीन-चार मजली इमारतीच्या खिडकीवर आदळले. यातच भारतीय नागरीकांचा मृत्यू झाल्याचे त्यांनी सांगितले.