डोडोमा : टांझानियातील व्हिक्टोरिया तलावात (Tanzania Lake Victoria) एक प्रवासी विमान कोसळलं आहे. एएफपी या वृत्तसंस्थेनं पोलिसांच्या हवाल्यानं ही माहिती दिलीय. विमानात किती प्रवासी होते याची माहिती अद्याप मिळालेली नाहीये.

मिळालेल्या माहितीनुसार, टांझानियाच्या कागेरा भागातील बुकोबा येथील व्हिक्टोरिया तलावात विमान कोसळलं आहे. सध्या बचावाचे प्रयत्न सुरू आहेत. हे विमान प्रिसिजन एअरचं आहे. तलावात अनेकांचा बुडून मृत्यू झाल्याचं वृत्त असून विमान तलावात बुडाल्याची छायाचित्रंही समोर येत आहेत.

विमानतळापासून 100 मीटर अंतरावर दुर्घटना

विमानतळापासून सुमारे 100 मीटर अंतरावर एका प्रिसिजन एअरच्या विमानाला अपघात झाला आहे, असं प्रादेशिक पोलिस कमांडर विल्यम मवाम्पघले यांनी बुकोबा विमानतळावर (Bukoba Airport) पत्रकारांना सांगितलं. विमानातील प्रवाशांच्या संख्येबद्दल कोणतीही माहिती तात्काळ मिळाली नाही. परंतु, स्थानिक मीडिया अहवालात म्हटलंय की, आर्थिक राजधानी दार एस सलाम ते लेकसाइड शहरापर्यंतच्या फ्लाइटमध्ये सुमारे 49 लोक होते.