मॉस्को : युक्रेनवर रशियाकडून हल्ला होण्याची पाश्‍चिमात्य देशांना वाटणारी शंका दूर झाली नसताना आणि तणावाचे ढग कायम असतानाही उद्या (ता. १९) मोठा लष्करी सराव घेण्याचे रशियाने आज जाहीर केले आहे. या सरावावेळी क्षेपणास्त्रांचीही चाचणी घेतली जाणार आहे. त्याचवेळी जर्मनीतील म्युनिच येथे आयोजित केलेल्या सुरक्षा परिषदेतही युक्रेनच्याच मुद्द्यावर चर्चा करण्यासाठी जागतिक नेते येत आहेत. (Global News)

रशिया आणि बेलारूसचा सध्या संयुक्त लष्करी सराव सुरु असून या दोघांच्या सीमा युक्रेनला लागून आहेत. याच सीमेवर हा सराव सुरु आहे.

या सरावाच्या निमित्ताने रशियाने सीमेवर तैनात केलेल्या सैनिकांची संख्या दीड लाख झाली असून रशियाचे युक्रेनवर कोणत्याही क्षणी आक्रमण होऊ शकते, असा अमेरिकेचा दावा आहे. यामुळे निर्माण झालेल्या तणावाच्या पार्श्वभूमीवरच रशियाच्या संरक्षण मंत्रालयाने उद्या मोठा लष्करी सराव घेण्याचे जाहीर केले असून त्याअंतर्गत क्रूझ क्षेपणास्त्रांची चाचणी घेणार असल्याचे सांगितले आहे.

ठळक घडामोडी

• युरोपातील शांततेला धक्का लावण्याचा रशियाचा प्रयत्न असल्याचा जर्मनीचा आरोप

• युक्रेनवर हल्ला करण्यासाठी रशियाकडून कारणाचा शोध

• आणखी सैन्य आणि रणगाडे मागे घेतल्याचा रशियाचा दावा

• संयम राखण्याचे युक्रेनचे अमेरिकेसह मित्रदेशांना आवाहन