ओटावा - रशिया युक्रेनवर हल्ल्याच्या तयारीत आहे. याबाबत रशियाने स्पेशल ऑपरेशनची घोषणासुद्धा केली आहे. यामुळे दोन्ही देशांमधील तणाव वाढला आहे. अमेरिकेनं या दोन्ही देशांमध्ये कधीही युद्ध होऊ शकतं अशी शंका व्यक्त केली आहे. दरम्यान, युक्रेनचे परराष्ट्र मंत्री दिमित्रो कुलेबा यांनी म्हटलं की, जगात दुसऱ्या महायुद्धानंतर हे सर्वात मोठं सुरक्षा संकट आहे. (Russia Ukraine Crisis News Updates)

युक्रेन स्वत:ला सुरक्षित ठेवेल आणि जिंकेलसुद्धा असं युक्रेनच्या परराष्ट्र मंत्र्यांनी ठणकावून सांगितलं आहे. पुतीन यांनी युक्रेनविरुद्ध युद्ध पुकारलं आहे. युक्रेनमधील शांत शहर आता युद्धाच्या सावटाखाली आहे. हे खूपच आक्रमक असं युद्ध आहे. पुतीन यांना थांबवणं जगाला शक्य आहे आणि थांबवायलाच हवं. आता कृती करण्याची वेळ आली असल्याचंही ते म्हणाले.

जगाने आता तातडीने पावलं उचलायला हवी. रशियावर लवकरात लवकर निर्बंध लादायला हवेत. तसंच रशियाला सर्व बाजूनी घेरायला हवं, त्यांची नाकाबंदी करून एकटं पाडायला हवं. शस्त्रे इतर आवश्यक साधनांची युक्रेनला मदतीची गरज आहे. तसंच आर्थिक आणि मानवतावादी दृष्टीकोनातून मदतीचा हात हवा आहे. युरोपसह जगाचं भविष्य यामुळे धोक्यात आल्याचंही दिमित्रो कुलेबा यांनी सांगितलं.