मागच्या काही दिवसांपासून रशिया युक्रेन यांच्यामध्ये युध्द सुरू असून रशियावर अनेक पाश्चमात्य देशांनी निर्बंध लादले आहेत. यातच रशियाने युक्रेनवर (Russia Ukraine War) केलेल्या अक्रमाणानंतर राष्ट्राध्यक्ष व्लादिमीर पुतिन यांच्या युद्धाला विरोध दर्शवत रशियन हवामान दूत असलेल्या अनातोली चुबैस (Anatoly Chubais) यांनी राजीनामा दिला आहे. यासोबतच त्यांनी देश देखील सोडला आहे. तज्ञांच्या माहितीनुसार हे युक्रेनवरील आक्रमनानंतर रशियाशी संबंध तोडणारे सर्वोच्च-स्तरीय अधिकारी ठरले आहेत.

अनातोली हे 1990 च्या दशकातील रशियन आर्थिक सुधारकांपैकी एक आहेत जे पुतीन यांच्या सरकारमध्ये राहिले आणि त्यांनी पाश्चात्य अधिकार्‍यांशी जवळचे संबंध ठेवले. रशियाच्या 1990 च्या दशकाच्या खाजगीकरणाचे शिल्पकार म्हणून ओळखले जाणारे, चुबैस यांनी 1990 च्या मध्यात पुतिन यांना त्यांची क्रेमलिनमधील पहिली नोकरी दिली. पुतिन यांच्या नेतृत्वाखाली चुबैस यांनी गेल्या वर्षी शाश्वत विकासासाठीचे दूत म्हणून नियुक्ती होईपर्यंत मोठ्या सरकारी कंपन्यांमध्ये उच्च पदावर काम केले.

रशियाच्या आक्रमणानंतर रशियन सरकारवर देशांतर्गत टीकाकारांचा दबाव वाढवला आहे. यातच पुतिन यांनी 16 मार्च रोजी इशारा दिला होता की ते रशियाला "घोटाळे आणि देशद्रोही" यांच्यापासून मुक्त करतील. दरम्यान मागच्या आठवड्यात दिमित्री मेदवेदेवचे यांचे वरिष्ठ आर्थिक सल्लागार राहिलेल्या अर्काडी दोरकोविच यांनी युक्रेनवरील रशियन आक्रमणाचा निषेध केल्यानंतर रशियन सरकारच्या स्कोल्कोव्हो टेक्नॉलॉजी फंडचे प्रमुख म्हणून पद सोडले होते. युक्रेन युद्धाविरुद्ध बोलणाऱ्या काही माजी वरिष्ठ अधिकाऱ्यांपैकी अर्केडी हे एक आहेत.