रशियन लष्कराने केलेल्या आक्रमणासमोर झुकणार नाही, अशी भूमिका युक्रेनचे अध्यक्ष वोलोडिमिर झेलेन्स्की (Volodymyr Zelensky) यांनी घेतलीये. शरण या म्हणणाऱ्या रशियाचे अध्यक्ष व्लादिमीर पुतिन यांच्या सैन्यासमोर अखेरच्या श्वासापर्यंत लढेन, अशा शब्दांत त्यांनी जशास तसे उत्तर देण्यास सज्ज आहोत, असा पवित्रा घेतलाय. पण आता त्यांनी राजधानीतून पळ काढल्याचे वृत्त समोर येत आहे. वोलोडिमिर झेलेन्स्की यांनी राजधानी किव सोडल्याचा दावा रशियन प्रसारमाध्यमांकडून करण्यात आला आहे. यासंदर्भात युक्रेनकडून अद्याप कोणतीही प्रतिक्रिया आलेली नाही.

शुक्रवारी युक्रेनची राजधानी किववर रशियाने हल्ला केल्यामुळे अमेरिकेने राष्ट्राध्यक्ष वोलोडिमिर झेलेन्स्की यांना किवसोडण्याचा सल्ला दिला होता. यासाठी अमेरिकेने मदत देण्याचे आश्वासन दिले होते. पण झेलेन्सी यांनी अमेरिकेची ही ऑफर धुडकावून लढण्याची तयारी दर्शवली होती.

युक्रेनचे अध्यक्ष वोलोडिमिर झेलेन्स्की (Volodymyr Zelensky) यांनी राजधानी किव सोडून पळ काढला आहे, असा दावा रशियन प्रसारमाध्यमांनी केलाय. याआधी राष्ट्राध्यक्षांनी खोट्या बातम्यांवर विश्वास ठेवू नका. युक्रेनच लष्कर अखेरच्या श्वासापर्यंत जनतेसाठी लढेल, असा विश्वास व्यक्त केला होता. त्यामुळेच रशियातील प्रसारमाध्यमांनी केलेला दावा आता चर्चेत आलाय.