ढाका : विद्यार्थ्यांच्या आंदोलनाला हिंसक वळण लागल्यानंतर राजकीय अस्‍थिरता निर्माण झालेल्या बांगलादेशात कायदा आणि सुव्यवस्था बिघडली असल्याने नागरिकांमध्ये भीतीचे वातावरण निर्माण झाले आहे. लूटमार आणि दरोड्याच्या घटनांमुळे बांगलादेशातील अनेक नागरिकांची झोप उडाली आहे.

‘‘काल रात्री काही गुंडांच्या सशस्त्र टोळ्यांनी आमच्या शेजारच्या घरावर हल्ला केला. त्यांनी तेथे धुडगूस घातला आणि घरातील दागिने आणि पैसे लुटले’’ अशी माहिती येथील नवोदय हाउसिंग सोसायटी येथे राहणाऱ्या एका व्यक्तीने स्थानिक माध्यमांना गुरुवारी दिली.

बांगलादेशातील अनेक ठिकाणी लूटमारीच्या घडत असल्याने नागरिकांमध्ये भीतीचे वातावरण आहे. या लूटमारीच्या घटनांमुळेच येथे रात्रीच्यावेळी नागरिक गटागटाने गस्त घालत आहेत. लूटमार आणि दरोड्याच्या भीतीने गेले काही दिवस आम्ही रात्रीचे झोपू शकलो नाही, अशी प्रतिक्रिया ढाक्यातील उत्तरा आणि मोहम्मदपूरा येथील अनेक नागरिकांनी दिली आहे.

लुटीचे व्हीडिओ व्हायरल

समाजमाध्यमांत विविध ठिकाणच्या लूटमारीची अनेक दृश्‍ये येथील नागरिकांनी समाज माध्यमांवर पोस्ट केली आहेत. ‘‘मंगळवारी रात्री मोहम्मदपूरा परिसरात शस्त्रधारी गुंडानी येथे दहशत माजवली होती. येथील मशिदींमधून नागरिकांना सावध राहण्याच्या सूचना दिल्या जात आहेत.’’ अशी माहिती विद्यापीठात काम करणारे शिक्षक नझवी इस्लाम यांनी दिली.

रहिवाशांकडून गस्त

बुधवारी रात्री मोहम्मदपूरा परिसरातील नागरिकांनी रात्रभर या परिसरात गस्त घातली. यावेळी येथील मदरशांमधील काही विद्यार्थ्यांनीदेखील गटागटाने येथील रहिवाशांबरोबर गस्त घातली, अशी माहिती स्थानिक माध्यमांनी दिली.

‘एटीएम’ रिकामे

बांगलादेशातील बहुतांश ठिकाणच्या ‘एटीएम’ मशिनमध्ये पैसे संपले असल्याने नागरिकांना अडचणीचा सामना करावा लागत आहेत. त्याचप्रमाणे येथील बँकांमध्येही रोकड कमी असल्याचे काही बँकांच्या अधिकाऱ्यांनी सांगितले. पुबाली बँकेचे व्यवस्थापकीय संचालक महम्मद अली म्हणाले की, हिंसाचारामुळे येथील बँकांमध्ये आणि एटीएममध्ये रोकड वितरित करणे अशक्य झाल्याने ही चणचण भासत आहे.