वॉशिंग्टन : उडत्या तबकड्या अर्थात यूएफओ पाहिल्याचा दावा जगभरातील अनेक लोकांनी केला आहे. यावरून सुरू असलेल्या वादादरम्यान अमेरिकेचे माजी राष्ट्राध्यक्ष बराक ओबामा यांनी महत्वाचं विधान केलं आहे. जर एलियन्स यांचं अस्तित्व मान्य झालं, तर जगभरातील लोकांच्या धार्मिक आस्था बदलतील. यानंतर शस्त्रास्त्रांनी सुसज्ज होण्यासाठी जगभरात गोंधळ उडेल, आणि यावर बरेच पैसे खर्च केले जातील. यामुळे पृथ्वीतलावर बरेच क्रांतिकारक बदल झाल्याचे दिसून येईल. (US former president Barack Obama made statement about Aliens UFO)

ओबामा पुढे म्हणाले की, एलियंस म्हणजे परग्रहावरील जीवांची खात्री पटल्यास अनेक नवीन धर्म उदयास येतील. तसेच एलियंससंदर्भातील कोणत्याही धोक्याला सामोरे जाण्यासाठी, जगभरात शस्त्रास्त्रांवर खर्च करण्याची मागणी खूप वेगाने वाढेल. एलियंसच्या अस्तित्वामुळे जीवनाकडे पाहण्याचा लोकांचा दृष्टिकोन बदलणार नाही, असंही ओबामा यांनी म्हटले आहे. अमेरिकेच्या लष्करामधील जवान बर्‍याचदा यूएफओ पाहत असतात, अशा बातम्या आल्या होत्या, या पार्श्वभूमीवर ओबामांनी हे विधान केल्याने त्याची जोरदार चर्चा सुरू झाली आहे.

न्यूयॉर्क टाईम्सला दिलेल्या मुलाखतीत ओबामांनी एलियन्सबद्दल त्यांचे विचार मांडले. जर एलियन्सच पृथ्वीवरील अस्तित्व मान्य झालं तर तुमचं मत काय? असा प्रश्न ओबामांना विचारण्यात आला. त्यावेळी ओबामा म्हणाले की, 'ही गोष्ट अत्यंत रंजक आहे. यामुळे माझे पूर्ण राजकारण बदलेल. कारण या विश्वात आपणच एकमेव जीवित प्राणी आहोत आणि अंतराळात सैर करू शकतो, असा विश्वास मी माझ्या संपूर्ण राजकीय कारकीर्दीत ठेवला आहे.

अमेरिकेचे गुप्तचर अधिकारी म्हणतात...

ओबामा पुढे म्हणाले की, 'महत्त्वाची गोष्ट ही आहे की, स्वत:चे रक्षण करण्यासाठी आपल्याला शस्त्रास्त्रांवर बरेच पैसे खर्च करावे लागतील, यात शंका नाही. एवढेच नाही, तर नवीन धर्मही जन्माला येतील.' अलीकडेच सीबीएस न्यूजने हे सिद्ध केले की बर्‍याच सैनिकांनी आकाशात यूएफओ पाहिले आहेत. दुसरीकडे अमेरिकेच्या गुप्तचर अधिकाऱ्यांना तपासात अशा कोणत्याही उडत्या तबकडीबद्दल माहिती मिळालेली नाही.

(Edited by : Ashish N. Kadam)

जगभरातील आणखी बातम्या वाचण्यासाठी येथे क्लिक करा.