नवी दिल्ली- पंतप्रधान नरेंद्र मोदी हे तीन दिवसांच्या अमेरिका दौऱ्यावर आहेत. अमेरिकेमध्ये क्वाड देशांची परिषद भरवण्यात आली आहे. यानिमित्ताने अमेरिकेचे मावळते अध्यक्ष जो बायडेन यांनी त्यांना निमंत्रण दिले होते. नेत्यांच्या भेटीगाठी दरम्यान एक थोडासा विचित्र प्रकार पाहायला मिळाला. जो बायडेन हे आपल्याला कोणाची ओळख करून द्यायची आहे हेच विसरले होते.

झालं असं की, जो बायडेन कॅन्सर संशोधना संबंधी एका कार्यक्रमात बोलताना समारोप करत होते. यावेळी त्यांना पंतप्रधान नरेंद्र मोदी यांना बोलण्यासाठी बोलवायचे होते. पण, आपल्याला कोणाला बोलवायचं आहे हे जो बायडेन विसरून गेले. यावेळी त्यांना त्यांच्या स्टाफची मदत घ्यावी लागली. पुढचा कोण आहे? अशी विचारणा त्यांनी केली.

जो बायडेन यांच्या या प्रश्नावेळी कार्यक्रमामध्ये थोडावेळ शांतता पसरली होती. नंतर स्टाफ कर्मचाऱ्याने पंतप्रधान मोदी यांचे नाव उच्चारले. मोदी खुर्चीवरून उठून जो बायडेन यांच्याजवळ गेले. यावेळी बायडेन यांनी परिस्थिती सांभाळण्याचा प्रयत्न केला. आपले पाहुणे एका छोट्या देशातून आले आहेत. आपल्यासारखीच त्यांच्या देशात लोकसंख्या कमी आहे, असं म्हणत त्यांनी वातावरणात हलकेफुलकेपणा आणला. पण, सोशल मीडियावर या घटनेची क्लिप व्हायरल होत आहे.

सोशल मीडियावर हा व्हिडिओ व्हायरल झाल्यानंतर यावर वेगवेगळ्या प्रतिक्रिया येऊ लागल्या आहेत. जो बायडेन हे खरंच सगळं विसरले होते. पण, नंतर एक जोक मारून परिस्थिती हातळण्याचा प्रयत्न केला. हे केविलवाणे आहे, असं एकाने म्हटलं. दुसऱ्या एकाने बायडेन यांची पाठराखण केली आहे. बायडेन हे विनोदी होण्याचा प्रयत्न करत होते इतकंच असं नेटकऱ्याने म्हटलं.

दरम्यान, अमेरिकेमध्ये क्वाड देशांची परिषद सुरु आहे. क्वाड संघटनेमध्ये अमेरिका, भारत, ऑस्ट्रेलिया आणि जपान या चार महत्त्वाच्या देशांचा समावेश होतो. चीनसारख्या देशांवर दबाव आणण्यासाठी चार देशांनी मिळून स्थापन केलेली ही संघटना आहे. चीनच्या प्रभावाला कमी करण्यासाठी या देशांनी मोट बांधलेली आहे. अमेरिकेमध्ये अध्यक्षपदाच्या निवडणुका होण्याआधी ही परिषद होत आहे. त्यामुळे याला महत्त्व आहे.