अमेरिकेसह भारतात सध्या एक व्हिडिओ व्हायरल होत आहे. ज्यामध्ये एक तरुण अमेरिका, अमेरिकन सरकार आणि लोकशाही हे कॅन्सर असल्याचे म्हणत आहे.

दरम्यान MEMRI या वृत्तवाहिनीने दिलेल्या माहितीनुसार या विद्यार्थ्याचे नाव मोहम्मद नुसैरत असे असून, तो इलिनॉय शिकागो विद्यापीठात शिक्षण घेत आहे. व्हायरल होत असलेला व्हिडिओ 3 मे 2024 रोजी झालेल्या एका प्रवचनातील आहे.

याचबरोबर तो विद्यार्थी असेही म्हणाला की, "इस्लाम हा एक न्याय्य धर्म आहे जो समाजावर लादला गेला पाहिजे."

युनिव्हर्सिटीच्या मुस्लिम स्टुडंट असोसिएशनने आयोजित केलेल्या एका कार्यक्रमात हा विद्यार्थी म्हणाला, "अमेरिका हा कॅन्सर आहे. अमेरिका, अमेरिकन सरकार, धर्मनिरपेक्षता, लोकशाही, भांडवलशाही, हे कॅन्सर आहेत ज्यांनी हा रोग जगभर पसरवला आहे,"

हा विद्यार्थी पुढे बोलताना म्हणाला, "मुस्लिम या कर्करोगाला, अमेरिकन सरकारला आणि लोकशाहीला कंटाळले आहेत. त्यांना जीवनाचा नवा मार्ग पहायचा आहे. आणि मुस्लिम म्हणून, आपल्याला हे समजले पाहिजे की आपल्याला नवीन जीवनपद्धती असली पाहिजे. इस्लाम हा एक न्याय्य धर्म आहे जो समाजावर लादला गेला पाहिजे."

सोशल मीडियावर व्हायरल झालेल्या नुसैरतच्या या भाषणावर मोठ्या प्रमाणावर टीका होत आहे. या व्हायरल व्हिडिओखालील कमेंटमध्ये एक युजर म्हणाला "आमच्या देशातून निघून जा. आमच्या देशाचा द्वेष करणारा कोणीही अमेरिकेत आम्हाला नको आहे. आणि परत कधीही इकडे येऊ नको."

दुसऱ्या एका युजरने लिहिले की, "त्याची स्कॉलरशिप आणि व्हिसा तात्काळ रद्द करण्यात यावा." तर आणखी एक युजरने कमेंट केली की, "जे लोक अमेरिकेला कंटाळले आहेत त्यांनी अमेरिकेत राहू नये."