रशियाचे अध्यक्ष व्लादिमीर पुतीन यांना हार्ट अटॅक आला होता, असा दावा एका टेलिग्राम चॅनलने केला आहे. ते आपल्या खोलीमध्ये खाली कोसळलेले आढळले. यानंतर डॉक्टरांनी वेळीच त्यांच्यावर उपचार करुन त्यांचा जीव वाचवला, असं या चॅनलने सांगितलं आहे. क्रेमलिनमधील एका माजी अधिकाऱ्याचं हे चॅनल असल्याचं सांगण्यात येत आहे.

WION या वृत्तसंस्थेने याबाबतचं वृत्त प्रसिद्ध केलं आहे. ही घटना रविवारी (22 ऑक्टोबर) घडल्याचं सांगण्यात येत आहे. याबाबत माहिती समजतचाच त्वरीत डॉक्टरांना पाचारण करण्यात आलं, आणि पुतीन यांना तातडीने त्यांच्या निवासस्थानी असलेल्या आयसीयू फॅसिलिटीमध्ये नेण्यात आलं.

General SVR नावाच्या टेलिग्राम चॅनलवरुन याबाबत माहिती देण्यात आली. हे चॅनल रशियाच्या माजी लेफ्टनंट जनरलचं असल्याचं सांगण्यात येत आहे. या चॅनलवरुन सांगण्यात आलं, की "पुतीन यांच्या निवासस्थानी तैनात असणाऱ्या दोन सिक्युरिटी ऑफिसर्सना अचानक आतून काहीतरी कोसळल्याचा आवाज आला. ते आत गेले असता, पुतीन फरशीवर कोसळलेले दिसून आले. त्यानंतर तातडीने डॉक्टरांना पाचारण करण्यात आले."

डुप्लिकेट पुतीनचा वापर?

रशिया-युक्रेन युद्ध सुरू झाल्यापासून पाश्चिमात्य माध्यमांमध्ये पुतीन यांच्या तब्येतीबाबत बऱ्याच चर्चा होत आहेत. पुतीन हे मोठ्या प्रमाणात आजारी असल्याचं सांगण्यात येत आहे. त्यामुळेच ते लोकांसमोर येण्याचं प्रमाणही कमी झाल्याचं म्हटलं जात आहे. जनरल एसव्हीआर या चॅनलवरुन पूर्वी असाही दावा करण्यात आला होता, की चीन दौऱ्यावर गेलेले पुतीन हे खरोखरचे पुतीन नसून, त्यांच्यासारखी दिसणारी दुसरीच व्यक्ती होती.