China America Talk on Ukraine Russia War : चीन युक्रेनवरील युद्धासाठी (Ukraine Russia War) रशियाला मदत करू नये, यासाठी अमेरिका (America) प्रयत्न करत आहे. अमेरिकेने रशियाविरोधात बोलण्यासाठी चीनवर दबाव आणण्याचा प्रयत्नही केला. अमेरिकेचे अध्यक्ष जो बायडेन (Biden) यांनी चीनचे राष्ट्रपती शी. जिनपिंग (Xi Jinping) यांच्यासोबत फोनवरून चर्चा केली. यावेळी चीन आणि अमेरिकेने मिळून जागतिक शांततेची जबाबदारी पार पाडली पाहिजे, असं जिनपिंग म्हणाले.

अमेरिकेचे म्हणणे काय? -

रशियाचे अध्यक्ष व्लादिमीर पुतिन यांना चीनने पाठिंबा दिल्याबद्दल आणि युक्रेनमध्ये रशियाच्या हल्ल्याचा निषेध न करण्याबद्दल बायडेन यांनी चीनला प्रश्न विचारले. या युद्धाच्या परिस्थितीत चीन कोणाच्या बाजूने उभा आहे? असा सवाल बायडेने यांनी जिनपिंग यांना विचारला, असे व्हाईट हाऊसचे प्रेस सेक्रेटरी जेन साकी यांनी सांगितले.

चीनचं उत्तर काय? -

चीनने प्रत्येक वेळी जीवितहानी टाळण्यासाठी सर्वतोपरी प्रयत्न करण्याचे आवाहन केले आहे. युक्रेनमधील सामान्य लोकांना कशाची जास्त गरज आहे, अन्न की मशीन गन? असा सवाल चीनच्या परराष्ट्र मंत्रालयाचे प्रवक्ते झाओ लिजियान यांनी उपस्थित केला. अमेरिका युक्रेनला शस्त्रास्त्रे पुरवून रशियाला चिथावणी देत संघर्ष वाढवत असल्याचा आरोप चीनने केला आहे. पण, युक्रेनला शस्त्रे सोडून इतर मानवतावादी मदत करायला चीन तयार आहे, असं चीनच्या परराष्ट्र मंत्रालयाचे प्रवक्ते झाओ लिजियान यांनी सांगितले.

चीनने स्वतःला ठेवले दूर -

रशियाने युक्रेनवर हल्ला केल्यानंतर रशियाला विरोध करण्यासाठी अनेक बैठका झाल्या. पण, प्रत्येक बैठकीमध्ये चीनने तटस्थ भूमिका घेतली. चीनने रशियाविरोधात बोलण्याचं टाळलं. त्यामुळे चीनकडून युद्धादरम्यान रशियाला कुठलीही मदत मिळू नये, असा प्रयत्न अमेरिका करत आहे. त्यासाठी बायडेन यांनी शी जिनपिंग यांच्यासोबत चर्चा केली.