नागपूर : धकाधकीच्या, स्पर्धेच्या युगात कळत-नकळत विविध आजारांचा विळखा पडतो. बदलत्या जीवनशैलीने कॅन्सरसारख्या दुर्धर आजार अधिकच घट्ट होत आहे. त्यातही महिलांमध्ये आरोग्यविषयी जागरूकता नसते, यामुळे स्तन कॅन्सरचे प्रमाण वाढत आहे. एकूण कॅन्सरपैकी महिलांमध्ये स्तन कॅन्सरचे प्रमाण १४ टक्के आहे. दरवर्षी एक लाख ८० हजार महिला स्तन कॅन्सरच्या विळख्यात अडकत आहे. विशेष असे की, महिलांनी थोडं जागरूक राहून स्व-परिक्षणातून स्तन कॅन्सरवर मात करू शकतात.

ऑक्टोबर महिना हा स्तन कॅन्सर जनजागृती महिना म्हणून साजरा करण्यात येतो. पुरुषांमध्ये हेड ॲण्ड नेक कॅन्सरनंतर महिलांमध्ये स्तन कॅन्सरचे प्रमाण १४ टक्के आहे, अशी माहिती कॅन्सर शल्यचिकित्सक डॉ. नितीन बोमनवार यांनी दिली. दरवर्षी १,८०,००० नव्या रुग्णांची भर पडत असल्यामुळे भविष्यात चिंताजनक परिस्थिती निर्माण होण्याचा धोका वर्तविण्यात येत आहे.

स्टेज ३ व स्टेज ४ अर्थात उशिराने स्तन कॅन्सरचे निदान होत असल्याने मृत्यूचा टक्का वाढला आहे. स्तन कॅन्सरसाठी वय, पूर्वेतिहास, आनुवंशिकता, किरणतोत्सारा प्रादुर्भाव, लठ्ठपणा, लवकर पाळी येणे, उशिरा रजोनिवृत्ती, उशिरा गर्भधारणा होणे, स्तनपान न करणे, रजोनिवृत्तीनंतरची हॉर्मोनल थेरपी, मद्यपान ही जीवनशैली कारणीभूत ठरत असल्याचेही डॉ. बोमनवार म्हणाले.

लक्षणे

• स्तनात किंवा काखेत गाठ येणे

• स्तनाच्या त्वचेची जाडी वाढणे

• स्तनांचा आकार व ठेवण बदलणे

• स्तनाग्रातून रक्तस्राव

• स्तनाची त्वचा लालसर होणे

टाळण्यासाठी हे करा

• मद्यपान टाळा

• मर्यादित हॉर्मोनल थेरपी

• आरोग्यदायी जीवनशैली

• नियमित व्यायाम

• संतुलित आहार

• लठ्ठपणा नियंत्रणात ठेवा