मधुमेहाचा आपल्या शरीरावर मोठ्या प्रमाणात परिणाम होतो हे सर्वांनाच माहिती आहे. मात्र, यामुळे आपल्या सेक्स लाईफवर काय परिणाम होतो याबाबत आपल्याकडे अगदी कमी बोललं जातं. हाय ब्लड शुगर आणि टाईप २ डायबेटिस या दोन्हीमुळे महिला व पुरूषांच्या लैंगिक आरोग्यावर दुष्परिणाम होत असल्याचं रिसर्चमध्ये समोर आलं आहे.

मधुमेहाचा थेट परिणाम होऊन किडनीचे विकार, हृदयविकार, वजन वाढणे अशा बऱ्याच समस्या उद्भवतात. मात्र त्यासोबतच, लैंगिक आरोग्यावर देखील याचा गंभीर परिणाम (Diabetes effect on sexual health) होतो. डायबेटिस असणाऱ्या व्यक्तींमध्ये लो सेक्स ड्राईव्ह दिसून येत असल्याचं डॉक्टरांनी सांगितले आहे.

हाय ब्लड शुगर

मधुमेह आणि लैंगिक आरोग्य यामध्ये महत्त्वाचा फॅक्टर म्हणजे हाय ब्लड शुगर असलेल्या लोकांमध्ये लिबिडो कमी प्रमाणात दिसून येतो. म्हणजेच, डायबेटिस असणाऱ्या व्यक्तींना सेक्सची इच्छाच कमी होते. तसंच, लैंगिक समाधान आणि आनंद मिळवण्याचा स्तरही अगदी कमी असतो, असं रिसर्चमध्ये दिसून आलंय.

पुरूषांना नपुंसकतेचा धोका

अमेरिकन डायबेटिस असोसिएशनने दिलेल्या माहितीनुसार, डायबेटिस असणाऱ्या पुरूषांमध्ये इरेक्टाईल डिस्फंक्शन (Diabetes and erectile dysfunction) आणि प्रीमॅच्युअर इजॅक्युलेशन अशा समस्या दिसून आल्या. तसेच, मधुमेहामुळे हार्मोन्सच्या फ्लोमध्ये अडथळा येण्याचा, आणि नसांना इजा पोहोचण्याचा देखील धोका असतो. यामुळेही लैंगिक क्षमतेवर परिणाम होतो.

महिलांमध्ये काय धोके?

मधुमेह असलेल्या महिलांमध्ये वेगाने वजन वाढणे, आणि मोठ्या प्रमाणात हार्मोनल इम्बॅलन्स दिसून येतो. यामुळे पुढे पीसीओएसची लक्षणं दिसून येतात. याचा सेक्शुअल हेल्थवर परिणाम होतो. लैंगिक इच्छा कमी होणे, व्हजायनल ड्रायनेस आणि इतर लक्षणंही यामुळे दिसून येतात.

या गोष्टी हाय ब्लड शुगर लेव्हल असणाऱ्या व्यक्तींसोबतच, टाईप २ डायबेटिस असणाऱ्या व्यक्तींमध्येही दिसून येतात. केवळ या आजारामुळेच नाही, तर कित्येक वेळा मधुमेहाच्या औषधांमुळेही ही लक्षणं दिसून येतात. त्यामुळे डॉक्टरांना भेटून समस्येचे मूळ ओळखणे गरजेचे आहे.