एखादी गोष्ट योग्य पद्धतीने पूर्ण करण्यासाठी त्यामध्ये मन गुंतवून काम करणे गरजेचं असते, हे आपण अनेकदा थोरामोठ्यांकडून ऐकले असेलच. मनावर नियंत्रण असेल तर आपण जीवनातील कित्येक मोठमोठ्या समस्यांवर सहजरित्या मात करू शकता. 

पण मन स्थिर नसेल, एकाग्र नसेल तर कामामध्ये फोकस करण्यात अडथळे निर्माण होतात. काही जण आपले महत्त्वाचे काम पूर्ण करण्यासाठी रात्र-रात्रभर जागरण करतात, पण यामुळे आरोग्यावर गंभीर परिणाम होण्याची शक्यता असते. 

एकाग्रतेमध्ये अडथळे येत असतील तर यावर रामबाण उपाय म्हणजे योगासने. नियमित आसनांचा सराव केल्यास मनावर नियंत्रण मिळेलच शिवाय कित्येक शारीरिक-मानसिक लाभही मिळतील. एकाग्रता वाढवण्यासाठी कोणकोणत्या आसनांचा अभ्यास करावा, जाणून घेऊया सविस्तर माहिती… 

एकाग्रता वाढवण्यासाठी आसनांमुळे मदत कशी मिळू शकते? 

मनाची एकाग्रता वाढवण्यासाठी योगासने महत्त्वपूर्ण भूमिका निभावू शकतात. कारण योगच्या माध्यमातून शरीर, श्वास आणि मेंदू एकत्रित जोडले जातात. योगासनांच्या अभ्यासामुळे शारीरिक व मानसिक ताणतणाव देखील कमी होण्यास मदत मिळते. 

ताडासन (Tadasana)

ताडासनाचा सराव करताना श्वासोच्छवासावर लक्ष केंद्रित करावे लागते. याचा सकारात्मक परिणाम मेंदूवरही होतो. या आसनामुळे तणावापासून मुक्तता मिळते आणि एकाग्रता वाढण्यासही मदत मिळू शकते.

सावधगिरी बाळगा - ताडासन करताना शरीर स्ट्रेच करावे लागते, यादरम्यान शारीरिक वेदना होऊ लागल्यास आसनाचा सराव करू नये. 

वृक्षासन (Vrikshasana)

वृक्षासनाचा सराव करताना आपल्याला एक पायावर उभे राहावे लागते आणि संपूर्ण लक्ष त्यावर केंद्रित करावे लागते. वृक्षासनाचा नियमित सराव केल्यास चिंता, तणावापासून मुक्तता मिळू शकते. यामुळे एकाग्रता वाढण्यास मदत मिळते.

सावधगिरी बाळगा - डोके व पाय दुखत असल्यास हे आसन करू नये. 

गरुडासन (Garudasana)

तुमचे कोणत्याही कामात मन लागत नाहीय? तर मग नियमित गरूडासनाचा सराव करावा. यामुळे मनाची एकाग्रता वाढण्यास नक्कीच मदत मिळू शकते.

सावधगिरी बाळगा - शरीराच्या स्नायूंमध्ये सूज असल्यास, सांधेदुखीची समस्या असल्यास या आसनाचा सराव करणे टाळावे.

बकासन (Bakasana)

बकासनामुळे कोणतेही काम करताना त्यामध्ये एकाग्रता टिकून राहण्यास मदत मिळते. कारण या आसनामुळे शरीरातील रक्ताचा प्रवाह वाढतो. ज्यामुळे मेंदूवर सकारात्मक परिणाम पाहायला मिळतात. 

सावधगिरी बाळगा - हात दुखत असल्यास किंवा हाताशी संबंधित काही समस्या असल्यास बकासनाचा सराव करू नये, कारण यामुळे शारीरिक दुखापती होण्याची शक्यता आहे.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.