Cancer Therapy : भारताच्या राष्ट्रपती द्रौपदी मुर्मू यांनी गुरूवारी कर्करोग या गंभीर आजारावरील उपचारांसाठी फायदेशीर असणारी पहिली स्वदेशी CAR –T Cell थेरपी मुंबईतल्या आयआयटी बाँम्बेमध्ये लाँच केली. जनुकांवर आधारित असलेल्या या थेरपीमुळे रक्ताच्या कर्करोगासह विविध कर्करोगांवर उपचार करण्यास मदत होणार आहे.

या थेरपीमुळे भारतातील अनेक रूग्णांचा जीव वाचवण्यास मदत होऊ शकणार आहे. कर्करोगाविरूद्धच्या लढाईतील ही मोठी झेप असल्याचे राष्ट्रपती द्रौपदी मुर्मू यांनी सांगितले.

ही थेरपी लाँच केल्यानंतर कार्यक्रमात बोलताना राष्ट्रपती द्रौपदी मुर्मू म्हणाल्या की, कर्करोगाची ही स्वदेशी विकसित थेरपी ‘मेक इन इंडिया’ या उपक्रमाचे उदाहरण आहे. ही थेरपी वैद्यकीय शास्त्रातील अभूतपूर्व प्रगती मानली जात आहे. त्या पुढे म्हणाल्या की, ही थेरपी कर्करोगाविरूद्धच्या लढ्यातील मोठे यश आहे. ही CAR-T सेल थेरपी सुलभ आणि परवडणारी आहे. संपूर्ण मानवजातीसाठी ही एक नवीन आशा प्रदान करते.

काय आहे CAR-T सेल थेरपी?

कर्करोगावरील या प्रभावी CAR-T सेल थेरपीमध्ये रूग्णाच्या टी पेशी (रोगप्रतिकारक प्रणाली पेशीचा एक प्रकार) बदलण्याचा समावेश असतो. या खास तयार केलेल्या टी-सेल्स कर्करोगाच्या पेशींवर हल्ला करतात आणि त्यांना नष्ट करण्याचे काम करतात. यामुळे, कर्करोगावरील उपचार आणखी सुलभ होणार आहेत. या थेरपीतील टी-सेल्स तयार करण्यासाठी जटिल अनुवांशिक अभियांत्रिकी आवश्यक आहे.

कुणी विकसित केली ही थेरपी?

कर्करोगावर प्रभावी ठरणारी ही CAR-T सेल थेरपी इंडियन इन्स्टिटूयट ऑफ टॅक्नोलॉजी (IIT) बाँम्बे आणि टाटा मेमोरिअल सेंटर यांनी विकसित केली आहे. विशेष म्हणजे NexCAR19 CAR टी-सेल ही थेरपी भारतातील पहिली मेड इन इंडिया CAR टी-सेल थेरपी आहे.

ही थेरपी कर्करोगावरील उपचारांचा खर्च कमी करण्यास मदत करेल. या कार्यक्रमात बोलताना एका वरिष्ठ अधिकाऱ्याने सांगितले की, परदेशात या थेरपीच्या किंमतीच्या तुलनेत भारतातील या थेरपीची किंमत केवळ १०% टक्के असेल. ज्यामुळे, कर्करोगावरील उपचारांच्या खर्चात लक्षणीय घट होईल, अशी अपेक्षा आहे.