कळंबा (कोल्हापूर) : श्रावणातील पावसाच्या कोसळणाऱ्या रिमझिम सरी, वातावरणातील आल्हाददायक गारवा, बोचरा वारा, दाट धुके, सूर्यकिरणातील इंद्रधनुष्याच्या छटा अशी अनेक वैशिष्ट्ये आणि निसर्गसौंदर्याची खाण असलेल्या कळंबा कात्यायनीच्या पठारावर फुलांचा रंगोत्सव सुरू झाला आहे. पांढरा शुभ्र, लाल, निळा, जांभळा, पिवळा, अबोली अशा अनेक रंगछटांचे पुष्पवैभव डोळ्याचे पारणे फेडत आहे. तसेच परिसरामध्ये औषधी गुणधर्म व आरोग्यवर्धक असणाऱ्या रानभाज्या मोठ्या प्रमाणात उगवल्या आहेत.