राजापूर: श्रावण सरींची पावसाची सुरू असलेली भुरभूर, त्याच्या जोडीने डोंगर रांगामधून दाटून येणारे आणि मनाला हवेहवेसे वाटणारे दाट धुके आणि त्यातूनच अवचितपणे पडणारे सोनेरी ऊन.अशा निसर्गाच्या मुक्त उधळणीमध्ये सह्याद्रीच्या कुशीपासून थेट समुद्र किनारपट्टीच्या विविध भागातील कातळ परिसर विविधांगी रंगीबेरंगी फुलांनी खुलला आहे. एरवी काळा तुळतुळीत आणि कोरडा दिसणारा कातळ परिसर आकर्षक फुलांनी श्रावणसरींमध्ये खुलून गेला आहे. त्यातूनच, या कातळांना सध्या ‘कास पठारा’चा नजारा चढला आहे. कातळीवरील डबकी आणि परिसरामध्ये सहा-सात इंच उंचीच्या इवल्याशा रोपट्यांवर फुललेल्या फुलांनी निसर्गसौंदर्य खुलले आहे.