जळगाव : मासे पकडण्यासाठी तलावावर गेलेल्या जळके- वसंतवाडी येथील ३५ वर्षीय तरुणाचा पाण्यात बुडून मृत्यू झाला.

संजय पंडित मोरे (रा. जळके) असे मृत तरुणाचे नाव आहे. जळके वसंतवाडी (ता. जळगाव) येथील रहिवासी संजय मोरे हातमजुरी करून उदरनिर्वाह करीत होता. मंगळवारी (ता. २८) सकाळी दहाच्या सुमारास तो शिरसोली शिवारातील तलावात मासे पकडण्यासाठी गेला होता. तलावात गाळ असल्याने त्याच्या पाण्यात बुडून मृत्यू झाला. इकडे संजय घरी न आल्याने त्याच्या कुटुंबियांनी त्याचा शोध सुरू केला.

मात्र, तो कुठेही आढळून आला नाही. बुधवारी (ता. २९) सायंकाळी पाचच्या सुमारास त्याचा मृतदेह तलावाच्या पाण्यात तरंगताना आढळून आला. घटनेची माहिती मिळाल्यानंतर एमआयडीसी पोलिस ठाण्याचे हवालदार जितेंद्र राठोड, जळके वसंतवाडीचे पोलिसपाटील संजय चिमणकारे, शिरसोली येथील पोलिसपाटील श्रीकृष्ण बारी यांनी घटनास्थळी धाव घेऊन मृतदेह बाहेर काढून सायंकाळी सातला जिल्हा शासकीय वैद्यकीय महाविद्यालयात दाखल केला. याबाबत एमआयडीसी पोलिस ठाण्यात आकस्मिक मृत्यूची नोंद झाली आहे.