चोपडा (जि. जळगाव) : शहरातील इंडियन गॅस एजन्सी येथील रोखपालाचे लक्ष विचलीत करून भामट्याने त्यांच्याजवळील पाच लाखांची रोकड असलेली पिशवी लंपास केली. ही घटना मंगळवारी (ता. ३१) दुपारी चारच्या सुमारास शहरातील पंचशीलनगर येथे घडली.

इंडियन गॅस एजन्सी रोखपाल केशरलाल मोतीलाल पाटील (वय ४५, रा. गरताड, ता. चोपडा) यांनी मंगळवारी (ता. ३१) दुपारी चारच्या सुमारास पंचशीलनगरजवळील स्टेट बँकेच्या शाखेतून रोख पाच लाख रुपये काढून सोबत असलेले रमेश सोनवणे (वय ४०, रा. चोपडा) यांच्याबरोबर दुचाकीने (एमएच १९, डीपी ०९१३) शहरातील बापू टी. हाऊस येथे चहा प्यायला गेले होते. त्यावेळी रमेश सोनवणे चहाच्या दुकानात गेले व केशरलाल पाटील हे बाहेर दुचाकीजवळ पाच लाख रोख असलेली कापडी पिशवी घेऊन उभे राहिले. तेव्हा त्यांच्या मानेवर मुंग्या आहेत, त्यावर पाणी टाका, असे एका तीस वर्षीय अनोळखी व्यक्तीने सांगितले व पाणी आणून दिले. केशरलाल पाटील हे मानेवर पाणी टाकण्यासाठी दुचाकीजवळ पैशांची कापडी पिशवी सोडून बाजूला आले असता दुसरी अनोळखी व्यक्ती पिशवी घेऊन पसार झाली. घटना घडल्यानंतर पोलिस तत्काळ घटनास्थळी दाखल झाले.

चोरीची मालिका सुरूच

गेल्या वर्षभरातील ही तिसरी घटना असून, नागरिकांमध्ये भीतीचे वातावरण आहे. यापूर्वी ८ सप्टेंबर २०२१ ला एका व्यापाराची १५ लाखांची रोकड असलेली बॅग लंपास झाली होती. तर २६ ऑक्टोबर २०२१ ला छत्रपती शिवाजी महाराज चौकातून अडीच लाखांची रोकड असलेली बॅग दिवसा चोरट्यांनी लंपास केली होती. आज पुन्हा पाच लाखांची रोकड घेऊन चोरटे फरार झाले आहेत. यामुळे नागरिकांमध्ये भीतीचे वातावरण आहे.