Jalgaon News : येथील तापी नदीच्या लहान पुलाजवळील फरशीजवळ पोहण्यासाठी गेलेले पाच तरुण पाण्यात बुडाल्यानंतर तिघांनी कसाबसा आपला जीव वाचवला. दोन मित्रांचा मात्र पाण्यात बुडून मृत्यू झाल्याची घटना रविवारी (ता. २१) दुपारी साडेचारच्या सुमारास घडली. (5 youths died after drowning in Tapi river jalgaon news)

खडका रोडवरील ग्रीन पार्क, ३२ खोली भागातील रहिवासी दानिश शेख जब्बार (वय १७) व अंकुश दौलतसिंग ठाकूर (वय १७) दोघे दुपारी दोनच्या सुमारास तापी नदी लहान पुलाजवळील फरशीजवळ पोहण्यासाठी गेले होते. त्यांच्यासोबत त्याच भागातील तीन युवकही होते. पाचही जण पाण्यात उतरल्यानंतर पोहू लागले.

मात्र, काही वेळातच पाचही जण बुडू लागले. आपण पाण्यात बुडत आहोत, हे लक्षात येताच तिघांनी कसाबसा आपला जीव वाचवला व ते पाण्याबाहेर आले.

आपल्यासोबतचे दोघे पाण्यात बुडल्याचे लक्षात येताच या तिघांनी घरी येऊन मृत तरुणांच्या परिवाराला घडलेली घटना सांगितली. त्यानंतर कुटुंबीयांसह नागरिकांनी तापी नदीवर धाव घेतली.

हेही वाचा : Credit Card फसवणूक....काय घ्याल काळजी?

या घटनेची माहिती पोलिसांना दिल्यानंतर घटनास्थळी पोलिस उपअधीक्षक सोमनाथ वाघचौरे, तसेच शहर पोलिस ठाण्याचे सहाय्यक निरीक्षक कंखरे व कर्मचारी दाखल झाले.

दोघी मृत युवकांचे मृतदेह पाण्यातून काढल्यानंतर शवविच्छेदनासाठी ग्रामीण रुग्णालयातील ट्रामा केअर सेंटरमध्ये आणण्यात आले. या घटनेची पोलिसांत नोंद करण्यात आली असून, दोन तरुणांचा असा दुर्दैवी मृत्यू झाल्याने परिसरात हळहळ व्यक्त होत आहे.