Jalgaon Crime News : येथे दुचाकीस्वाराचे लक्ष विचलीत करून त्याच्या गाडीला मागील बाजूला लावलेली तीन लाख रुपयांची प्लास्टिकची पिशवी अलगदपणे काढून पोबारा केला. ही घटना शहरातील स्टेशन रोडवरील बँक ऑफ बडोदा शाखेसमोर शनिवारी (ता. ७) दुपारी दीडच्या सुमारास घडली.( bike rider thief 3 lakh from bike jalgaon crime news)

ओझर (ता. चाळीसगाव) येथील राजेंद्र तान्हीराम वाणी (वय ५७) यांनी चाळीसगावातील स्टेशन रोडवरील बँक ऑफ बडोदा शाखेतून तीन लाखांची रक्कम काढून हे पैसे प्लास्टिकच्या पिशवीत ठेवून दुचाकीच्या मागे लावून ते घराकडे निघाले होत.

मात्र, दुचाकीवरून आलेल्या भामट्यांनी वाणी यांचे लक्ष विचलीत करून मागे लावलेली तीन लाखांची पिशवी लंपास केली. या प्रकरणी गुन्हा दाखल करण्यात आला आहे. हे भामटे परिसरातील सीसीटीव्हीमध्ये कैद झाले असून, पोलिसांनी या फुटेजच्या आधारे आरोपींची ओळख पटविण्याचे आवाहन नागरिकांना केले आहे.

याबाबत माहिती असल्यास शहर पोलिस ठाण्याचे निरीक्षक संदीप पाटील, पोलिस उपनिरीक्षक सुहास आव्हाड, पोलिस उपनिरीक्षक योगेश माळी, पोलिस कर्मचारी योगेश बेलदार यांच्याशी संपर्क साधावा, असे आवाहन करण्यात आले आहे. दरम्यान, गेल्या चार महिन्यातील ही तिसरी घटना आहे.

यापूर्वी शहरातील स्टेट बँकेसमोर, तसेच सेंट्रल बँकेसमोर ठेवीदारांचे दुचाकीच्या डिक्कीतून पैसे चोरीला गेल्याची नोंद पोलिस ठाण्यात झाली आहे. शहरातील या दोन घटना ताज्या असताना शहरापासून अवघ्या एक किलोमीटर अंतरावर असलेल्या ओझर गावातील रहिवाशांसंदर्भात घटना घडल्याने पोलिसांसमोर मोठे आव्हान निर्माण झाले आहे.