पाचोरा (जि. जळगाव) : बाळद बुद्रुक (ता. पाचोरा) येथील शेतशिवारात जोरदार पावसासह वीज पडल्याने बैल जागीच ठार होऊन दोघे जखमी झाल्याची घटना शुक्रवारी (ता. २४) रोजी सायंकाळी घडली. यामुळे सोमवंशी कुटुंबीय कमालीचे धास्तावले आहेत.

बाळद बुद्रुक परिसरात शुक्रवारी सायंकाळी विजांच्या कडकडाटासह जोरदार पाऊस झाला. पाऊस सुरू झाल्याने शेतशिवारात गेलेले शेतकरी घराकडे परतत असताना वीज कोसळल्याने बैल ठार झाला तर रोशनी सोमवंशी (वय ४०) व हर्षल सोमवंशी (वय २१) हे दोघे गंभीर जखमी झाले. त्यांना उपचारार्थ पाचोरा येथे दाखल करण्यात आले. या घटनेमुळे सोमवंशी कुटुंबीय कमालीचे धास्तावले आहेत.