जळगाव : राज्य उत्पादन शुल्कच्या पथकाने धरणगावात बनावट मद्याच्या कारखान्यावर छापा टाकून अटक केलेल्या भूपेंद्र मराठे याने दिलेल्या माहितीवरून सचिन पाटीलच्या मुसक्या आवळल्या गेल्या. त्यानंतर धारागीर येथे छापा टाकून पावणेदोन लाखांच्या बनावट मद्यासह एक वाहन असा ८ लाखांचा ऐवज जप्त करण्यात आला. या टोळीचा म्होरक्या अद्याप फरार आहे.(Counterfeit liquor case)

राज्य उत्पादन शुल्क विभागाने टाकलेल्या धाडीत अटक करण्यात आलेल्या सचिन पाटीलकडे या टोळीने तयार केलेल्या बनावट मद्याच्या वितरणाची जबाबदारी होती. भूपेंद्र मराठे (धरणगाव) याने दिलेल्या माहितीवरून धारागीर येथे प्लॉट एरियात जनावरांच्या गोठ्यातील कडब्याच्या गंजीमध्ये दडवलेले १ लाख ६० हजार रुपये किमतीचे बनावट देशी दारूचे ५५ बॉक्स जप्त करण्यात आले. या दारूच्या वाहतुकीसाठी वापरली जाणारी ६ लाखांची ट्रक (एमएच १८ एए ८६८४) जागेवरुन जप्त करण्यात आली.

सचिन पाटील याला पाळधी येथून ताब्यात घेण्यात आले होते. त्याला धरणगाव न्यायालयात हजर केले जाणार आहे. ही कारवाई जळगाव राज्य उत्पादन शुल्क विभागाच्या अधीक्षक सीमा झावरे यांच्या नेतृत्वाखाली निरीक्षक सी. एच. पाटील, दुय्यम निरीक्षक एस. एफ. ठेंगडे, आनंद पाटील, जवान एन. व्ही. पाटील, ए. व्ही. गावंडे, एम. डी. पाटील, के. पी. सोनवणे, राहूल सोनवणे यांच्या पथकाने केली. जिल्ह्यातील ही मोठी कारवाई ठरल्याने या टोळीतील आणखी संशयित हाती लागण्याची शक्यता आता वाढली आहे.

फरारी आरोपी धुळ्यातील?

गुन्ह्यामध्ये सुरुवातीला ११ लाख २ हजार ४०० रुपये किमतीचा आणि काल पोलिस कोठडीतील आरोपीने दिलेल्या माहितीनंतर ७ लाख ७३ हजार ४०० असा १८ लाख ७५ हजार ८०० रुपयांचा एकूण मुद्देमाल जप्त करण्यात आला. या टोळीला स्पिरिट, रिकाम्या बाटल्या, झाकणे आदी कच्चा माल पुरविणारा सहावा आरोपी मात्र फरार आहे. त्याचा शोध घेतला जात आहे. हा फरार आरोपी धुळ्यातील असावा, असा संशय आहे