Jalgaon News : सुरतहून मुळगावी झारखंडमध्ये जाण्यासाठी रेल्वेने निघालेल्या दांपत्याच्या एक महिन्याच्या बालिकेचा मृत्यू झाला.

मूलबाळ होत नसल्याने दत्तक घेतलेल्या बालिकेला हिरावल्याने दाम्पत्याने आक्रोश केला. हे दाम्पत्य धरणगावमार्गे रेल्वेने प्रवास करत असताना ही घटना नुकतीच घडली. (Death of couple adopted baby girl in railway jalgaon news)

भुसावळ रेल्वे पोलिसात याप्रकरणी अकस्मात मृत्यूची नोंद करण्यात आली आहे. राबिया हुमायू अन्सारी (रा. झारखंड हल्ली मुक्काम सुरत-गुजरात) असे मृत बालिकेचे नाव आहे. रेल्वे पेालिसांनी दिलेल्या माहितीनुसार झारखंडमधील रहिवासी हुमायू अन्सारी (वय ३०) हे पत्नी गुडीया यांच्यासह सुरत (ता.गुजरात) येथे कामगार म्हणून कार्यरत आहेत.

रेडीमेड कापड कारखान्यात ते नोकरीला आहेत. विवाह झाल्यापासून १० वर्षापर्यंत अन्सारी दांपत्याला अपत्य नव्हते. म्हणून हुमायू यांनी शालकाची एक महिन्याची मुलगी दत्तक घेतली होती.

नुकतेच ते झारखंडला जाण्यासाठी सुरत येथून रेल्वेने निघाले होते. प्रवासात मध्यरात्री धरणगाव येथून रेल्वे जात असताना चिमुरडी राबियाची प्रकृती अचानक खराब झाल्याने औषधोपचारासाठी अन्सारी दांपत्य भुसावळ रेल्वेस्थानकावर गाडी आल्यावर प्रवास थांबवून उतरले.

भुसावळ रेल्वे पोलिसांच्या मदतीने जळगाव जिल्हा शासकीय वैद्यकीय महाविद्यालयात राबियाला दाखल करण्यात आले. वैद्यकीय अधिकाऱ्यांनी तपासल्यावर बालिकेला मृत म्हणून घोषित केले. हे समजताच, दाम्पत्याने आक्रोश केला होता. सकाळी अकराला शवविच्छेदन करून मृतदेह नातेवाइकांच्या ताब्यात देण्यात आला.