जळगाव : राज्यसभा निवडणुकीत (Rajya Sabha Election) आम्ही मतांचे योग्य नियोजन करून महाविकास आघाडीला (Mahavikas Aghadi) पराभूत केले. विधान परिषदेच्या निवडणुकीतही (Legislative Council Election) आम्ही पाचवा उमेदवार निवडून आणणारच आहोत. त्यामुळे काँग्रेसने (Congress) आपला दुसरा उमेदवार मागे घ्यावा, असे थेट आवाहन भारतीय जनता पक्षाचे नेते व माजी मंत्री गिरीश महाजन (Grish Mahajan) यांनी ‘सकाळ’शी बोलताना केले आहे. (Girish Mahajan Satement on legislative council elections Nashik News)

राज्यसभेत भाजपचे तिसरे उमेदवार धनंजय महाडिक यांना निवडून आणण्याच्या प्रक्रियेत आमदार महाजनही होते. राज्यसभेतील यशानंतर ते आज जळगावी आले. आता राज्यात विधान परिषद निवडणुकीसाठी तयारी सुरू आहे. येत्या २० जूनला विधान परिषदेसाठी मतदान होत आहे. उमेदवारी अर्ज मागे घेण्याची सोमवारी (ता. १३) शेवटची तारीख आहे. या निवडणुकीत भाजपच्या चार जागा निश्‍चित असल्या तरी त्यांनी दोन अतिरिक्त उमेदवार उभे केले आहेत. मात्र एकाची माघार घेऊन पाचव्या जागेसाठी पक्ष मैदानात उतरणार आहे. शिवसेना व राष्ट्रवादी काँग्रसेचे दोन उमेदवारांचा विजय निश्‍चित असले तरी काँग्रेसचा दुसरा उमेदवारासाठी अतिरिक्त मतांची गरज आहे. भाजपला पाचव्या उमेदवारासाठी थेट २८ मतांची गरज आहे. तरीही भाजपने पाचव्या उमेदवारांच्या यशासाठी लढाई करण्याचा निर्णय घेतला आहे.

याबाबत बोलताना आमदार महाजन म्हणाले, की विधान परिषदेत पाचवा उमेदवार विजय करण्याचे आम्ही नियोजन केले आहे. आमच्या उमेदवाराला लागणाऱ्या मतांचा कोटा आम्ही मिळविण्याची तजवीज केली आहे. त्यामुळे आमचा उमेदवार निवडून येणारच, याची आपण आजच खात्री देत आहोत. आजच्या स्थितीत महाविकास आघाडीसोबत राहण्यास आमदार तयार नाहीत. महाविकास आघाडीचे नेते आमदारांना धाक दाखवीत आहेत, त्यांना धमक्या देत आहेत, त्याला आता आमदार कंटाळले आहेत. त्यामुळे हे आमदार आमच्या उमेदवाराला मतदान करतील, असा दावाही त्यांनी केला. विधान परिषदेत तर गुप्त मतदान पद्धती आहे. त्यामुळे महाविकास आघाडीचेही आमदार आमच्या उमेदवाराला मतदान करतील. त्यामुळे काँग्रेसने आपला एक उमेदवार मागे घेऊन आमचा पाचवा उमेदवार विजयी करून ही निवडणूक बिनविरोध करावी अन्यथा त्यांच्या उमेदवाराचा पराभव निश्‍चित आहे, हे आपण आजच खात्रीने सांगत आहोत, असेही ते म्हणाले.