Jalgaon News : शहरातील विद्यानगरमधील उद्योजक अशोक जाजू यांच्या निवासस्थानाच्या दुसऱ्या मजल्यावर मंगळवारी (ता. २३) सकाळी साडेसहाच्या सुमारास अचानक आग लागली. त्याचवेळी नळांना पाणी आल्यामुळे अशोक जाजू यांचे भाऊ मनोज जाजू वरच्या मजल्यावर गेले. (Household materials were destroyed in fire accident jalgaon news)

त्यांना कुलरच्या बाजुला असलेल्या सोफ्याला आग लागल्याचे लक्षात आले. त्यांनी आग विझविण्याचा प्रयत्न केला. घरातून धूर निघत असल्याने रस्त्यावरून जात असलेल्या मनोज मोहिते यांनी महापालिकेच्या अग्निशमन दलाला आगीबाबत माहिती दिली. वरच्या मजल्यावर अडकलेल्या मनोज जाजू यांना उतरविण्यात आले.

हेही वाचा : Credit Card फसवणूक....काय घ्याल काळजी?

अग्निशमन दलाचे पथक दाखल झाले. आग विझविण्यासाठी अग्निशमन दलाचे चार बंब लागले. आगीत सोफा, कुलर, एसीसह इतर साहित्य जळाल्याने मोठे नुकसान झाले.

अग्निशमन दलाचे सुनील मोरे, युसूफ पटेल, प्रदीप धनगर, नंदकिशोर खडके, निवांत इंगळे, भारत छापरिया, पन्नालाल सोनवणे, रवींद्र बोरसे, मोहन भाकरे, राजेंद्र रानवडे, नीलेश सुर्वे यांनी आग आटोक्यात आणली.