भुसावळ : शहरातील वांजोळा रस्त्यावरील प्रेरणानगर फाट्याजवळ दोन संशयितांना ताब्यात घेऊन त्यांच्याकडून गावठी कट्ट्यासह दोन जिवंत काडतूस जप्त करण्यात आले. बाजारपेठ पोलिस ठाण्याचे निरीक्षक राहुल वाघ यांच्या मार्गदर्शनाखाली पथकाने मोटारसायकलने घटनास्थळी सापळा रचून मिळालेल्या माहितीची खात्री केली असता, दोन संशयितांची अंगझडती घेतली असता, त्यांच्या ताब्यातून दोन गावठी कट्ट्यांसह दोन जिवंत काडतूस जप्त करण्यात आले. (2 live cartridges seized from Bhusawal with pistol )

संशयित मुकेश मोहन अटवाल (वय २०), यश किरण बोयत (वय २२) (दोघे रा. भुसावळ) अशी अटक केलेल्या दोघांची नावे आहेत. ही कारवाई शनिवारी (ता. ५) दुपारी सव्वाचारच्या सुमारास करण्यात आली. निरीक्षक वाघ यांच्यासह गुन्हे शोध पथकातील पोलिस उपनिरीक्षक मंगेश जाधव, पोलिस कर्मचारी विजय नेरकर, नीलेश चौधरी, महेश चौधरी, प्रशांत सोनार, अमर अढाळे, जावेद शहा, भूषण चौधरी, राहुल वानखेडे यांनी ही कारवाई केली.