Jalgaon Heavy Rain Damage : जळगाव शहरासह जिल्ह्यात रविवारी (ता. १४) पहाटेपासून पावसाने धुमाकूळ घातला आहे. जळगाव तालुक्यात पाच महसूल मंडलांत, तर चोपडा तालुक्यातील दोन महसूल मंडलात अतिवृष्टीची नोंद झाली आहे. सततच्या पावसाने जळगाव तालुक्यातील ‘फुपनगरी ते वडनगरी रस्ता’ रविवारी पहाटे झालेल्या पावसात वाहून गेला. यामुळे दोन्ही गावांचा संपर्क तुटला आहे. शहरासह जिल्ह्यात रात्रीपासून पावसाने जोर धरला आहे. (7 revenue mandals in Chopda taluka have recorded heavy rainfall )

यात सर्वाधिक पाऊस जळगाव व चोपडा तालुक्यांत झाला आहे. जळगाव तालुक्यातील जळगाव, असोदा, पिंप्राळा, नशिराबाद, भोकर या मंडलांत, तर चोपडा तालुक्यातील चोपडा व अडावद या महसूल मंडलांत ६० मिलिमीटरपेक्षा अधिक पाऊस झाला आहे. यामुळे येथे अतिवृष्टी झाल्याची नोंद झाली आहे. शहरातील राष्ट्रीय महामार्गावर अनेक ठिकाणी पाणी साचल्याने वाहनधारकांना कसरत करीत वाहने काढावी लागली आहेत.

शहरातील नवीपेठ, जुने जळगाव, पिंप्राळा परिसर शहरातील विविध कॉलन्यांतील खोलगट भागात पाणी साचले आहे. अनेक शेतातही पाणी साचून नुकसान झाले आहे. शहरातील भिकमचंद जैननगर परिसरातील मोतीमहल चौकासमोरील गल्लीत पाणी साचले आहे. रविवारचा दिवस असल्याने शहरात वर्दळ कमी असली, तरी अनेक ठिकाणी रस्त्यावर पाणी साचले होते.

स्टेट बँक रोडवर पाणीच पाणी

स्टेट बँकेच्या मुख्य शाखेसमोरील रोडवरील सिमेंटचा रोड नुकताच तयार झाला आहे. रोड उंच आणि गटारी खाली झाल्याने पाणी वाहून जाण्यास जागा नाही. यामुळे रोडवर पाणी साचले आहे. स्टेडियम कॉम्प्लेक्समधील दुकानांसमोर प्रचंड पाणी साचल्याने दुकानात जाण्यसाठी वाटच शिल्लक राहिली नव्हती. (latest marathi news)

बजरंग बोगदाही पाण्याखाली

रविवारच्या पावसाने नेहमीप्रमाणे बजरंग बोगदा पाण्याखाली गेला. या बोगद्यातील पाण्याचा निचरा ही मोठी समस्या आहे. अद्यापही त्यावर तोडगा निघू शकलेला नाही. थोडाही पाऊस झाला, तरी बोगदा पाण्याखाली जातो. रविवारी सकाळी जोरदार पाऊस झाल्याने बोगद्यात चार फुटापर्यंत पाणी साचले होते. त्यामुळे दोन्हीकडील वाहतूक ठप्प झाली.

महामार्गालगत पाणी

शहरातून जाणाऱ्या महामार्गालगतही बऱ्याच ठिकाणी पाण्याचे डबके साचले होते. अग्रवाल हॉस्पिटल चौकातील दुतर्फा सेवा रस्त्यांवर पाणीच पाणी होते. भुयारी मार्गातही पाणी साचले होते. तीच स्थिती प्रभात चौकात, दादावाडी- गुजराल पेट्रोलपंपासमोरील भुयारी मार्गाचीही होती. त्यामुळे वाहनधारकांना वाट काढणे कठीण झाले होते.

फुपनगरी ते वडनगरी रस्ता नुकताच बांधला होता. सततच्या पावसाने तो वाहून गेल्यामुळे कामाच्या गुणवत्ता किती खराब आहे, याची प्रचिती नागरिकांना आली. सार्वजनिक बांधकाम विभाग कामाचा दर्जा तपासताना कशाप्रकारे हितपूर्ण काळजी घेतो, याचा हा दाखला असल्याचे ग्रामस्थांनी सांगितले.

बांधकाम विभागाला कळविले

खचलेल्या रस्त्यावर भराव टाकण्यास सांगितले आहे. त्याबाबत सार्वजनिक बांधकाम विभागाला कळविले आहे, अशी माहिती तहसीलदार शितल राजपूत यांनी दिली. दुपारपर्यंत रोड खचलेल्या स्थितीतच होता. खचलेला रोड पाहण्यासाठी नागरिकांची गर्दी झाली होती.

अतिवृष्टी झालेली मंडले अशी

मंडल--पाऊस मिलिमीटर

जळगाव--७८.५

असोदा--९९

पिंप्राळा--८२

नशिराबाद--११७.८

भोकर--८२

चोपडा--११८.३

अडावद--१५३.३

गेल्या २४ तासांतील पाऊस

तालुका--मिलिमीटर

जळगाव--८१.३

भुसावळ--१०.५

यावल--२०.६

रावेर--०.८

मुक्ताईनगर--०.५

अमळनेर--६.३

चोपडा--५१.९

एरंडोल--१४.३

पारोळा--४.६

चाळीसगाव--८.८

जामनेर--२४.१

पाचोरा--११.९

भडगाव--५.३

धरणगाव--२९.६

बोदवड--६.०

एकूण-- १९.९