तोंडापूर : छत्रपती संभाजीनगर-जळगाव महामार्गावरील अजिंठा घाटात नियत्रंण सुटल्याने पुणे-रावेर बस उलटून नऊ जण जखमी झाले. शुक्रवारी (ता. ३) दुपारी एकच्या सुमारास हा अपघात घडला. पुणे येथून रावेर येथे जाण्यासाठी ६६ प्रवासी घेऊन जाणारी बस (एमएच ४०, वाय ५१९७) अजिंठा घाटात दुपारी एकच्या सुमारास रस्त्याच्या बाजूने उलटली. (Accident Pune Raver bus overturns in ghat)

यात नऊ प्रवाशी गंभीर जखमी झाले. घटनेची माहिती मिळताच सहाय्यक पोलिस निरीक्षक प्रफुल्ल साबळे यांनी फौजदार शरद वाघुले, रामराव आढे, भागवत शेळके, ज्ञानेश्वर बेले, ईश्वर पाटील आदी सहकाऱ्यांसह घटनास्थळी धाव घेऊन बचावकार्य सुरू केले आहे.

नऊ जखमींना अजिंठा ग्रामीण रुग्णालयात रुग्णवाहिकेद्वारे उपचारासाठी हलविले व बाकी सुखरूप असलेल्या प्रवाशांना दुसऱ्या बसमध्ये बसवून दिले. घटनेदरम्यान गंभीर जखमी झालेल्या तिघांना पुढील उपचारासाठी छत्रपती संभाजीनगर येथील घाटी येथील शासकीय रुग्णालयात पाठविण्यात आले. (Latest Marathi News)

जखमी प्रवाशांची नावे अशी : सुशीलाबाई दिनकर निरखे (७०), सुमित्रा दिनकर निरखे (४८), विजय हरी सूर्यवंशी (७२, तिघेही रा. जामनेर) यांना पुढील उपचारासाठी छत्रपती संभाजीनगर येथे पाठविण्यात आले.

किरकोळ जखमी असे ः सरूबाई श्‍यामराव पाटील (६५, रा. श्रीरामपूर), वसंत विठल पठारे (६५, रा. सोयगाव), निखिल किरण पाटील (१३, श्रीरामपूर), संध्या वसंतराव पठारे (६३, रा. सोयगाव), जयमाला विजय सूर्यवंशी (६०, रा. जामनेर), ज्योती साईचंद्र बासनेवल (४०, रा. संभाजीनगर).